“Qeveria të garantojë masat mbrojtëse për personelin mjekësor”/ Meta reagon pas vdekjes së Dr. Pushit

Presidenti Ilir Meta e ka quajtur si shokuese ndarjen nga jeta të Profesorit të Universitetit të Mjekësisë, Dr. Arjan Pushit, si pasojë e prekjes nga COVID-19.

Në një postim në rrjetet sociale, Meta thekson se kjo është humbja e parë e jetës në radhët e bluzave të bardha, ndërkohë që i ka bërë thirrje Qeverisë që të garantojë me përgjegjësi dhe transparencë të gjitha masat mbrojtëse për mjekët, infermierët dhe personalin e tyre mbështetës.

“Tepër e dhimbshme dhe shokuese humbja e jetës së Profesorit të nderuar të Universitetit të Mjekësisë, Doktor Arjan Pushi, hematologut të shquar me një kontribut të spikatur në dekada në sistemin tonë shëndetësor.

Kjo është humbja e parë e jetës nga mantelbardhët tanë, të cilët prej disa muajsh po ndeshen në vijën e parë me këtë pandemi, që tregon se jo vetëm rreziku nuk ka kaluar, por çdo nënvlerësim do të jetë me pasoja tepër serioze për shëndetin, jetën dhe ekonominë.

LEXO EDHE  Azem Hajdari u ndalua bashkë me një shok dhe një shoqe, Policia jep njoftimin zyrtar

Ndaj apeloj nevojën për të forcuar përqendrimin e të gjithë institucicioneve për respektimin me rigorozitet nga të gjithë të protokolleve shëndetësore, si dhe përsëris thirrjen drejtuar Qeverisë për të garantuar me përgjegjësi dhe transparencë të gjitha masat mbrojtëse për mjekët, infermierët dhe personelin e tyre mbështetës, të cilët rrezikojnë shëndetin e tyre për të mbrojtur shëndetin e të gjithëve ne.

Ngushëllimet më të ndjera familjes Pushi, të afërmve dhe kolegëve të Profesorit, për këtë humbje të madhe të pazëvendësueshme!”, thekson Meta.