Nga Boldnews.al
Kryebashkiaku i Vlorës Dritan Leli u bë për ujë të ftohtë, edhe pse Ujin e Ftohtë (si zonë turistike) nuk e kishte aq larg. Në një mbledhje të zhvilluar blic në qytetin bregdetar, kryeministri Edi Rama kritikoi ashpër kreun e bashkisë se nuk po përbushte “detyrat dhe urdhrat e tij”. Këtë e lidhte më një sondazh të zhvilluar në qytetin e Vlorës, ku qytetarët sipas “raportit konfidencial” të Ramës, nuk e donin kryeministrin e vendit masivisht.
Këtë dështim ia faturoi Lelit, (një personazh kokëulur i Rilindjes, që duket se e zë tmerri sa herë vjen kreu i qeverisë në qytet). E kur Rama e vuri poshtë, për çështje që vetë Leli nuk mban përgjegjësi, të gjithë iu sulën. Edhe Damian Gjiknuri gjeti forcat prej Guruje për ti dhënë shkelmin e fundit. Ky mjeshtër i tërheqjes pas vetes së “çunave problematik” iu hakërrye Lelit me gjuhën e Ramës.
Sa herë kryeministri vihet në siklet teksa sheh sondazhet dhe konstaton gropën e thellë të pakënaqësisë qytetare ndaj tij, bën një xhiro nga “çunat e fortë” nëpër bashkitë e vendit. Leli gjithçka mund të jetë, por në kategorinë e rangut të të fortit as ka ndërmend ta fusë veten. Ama është i pazoti që të gjejë një fije guxim për të thënë të vërtetën, që problem nuk është ai, por keqqeverisja qëndrore.
Por ka kryebashkiakë të tjerë plot që janë “fryma e pushtetit” të kryeministrit Rama të cilët shprehin gatishmëri të bëjnë të fortin me qytetarët dhe “qenin e rrahur” me kryeministrin. Janë ajo luguni e madh drejtuesish lokal që vijnë nga bota e errët e krimit, apo nga skutat e korrupsionit. I kanë kthyer bashkitë që drejtojnë në çifligje personale. Pas mbështeten nga grupe personazh me të shkuar po aq të errët sa vetë ata të cilët janë kthyer në biznesmenë dhe rrëmbejnë tenderat publik.
Nëpërmjet forcës së parasë dhe forcës së muskujve ata mbesin “jeta e qeverisjes” për të synuar edhe një mandate të tretë, ndonëse sondazhet çdo ditë e më shumë e thellojnë gropën e pakënaqësisë ku e ka futur Rama vendin.
E gjitha tabloja e krerëve të bashkisë mbyllet me të nënshtruar ndaj pushtetarëve qëndrorë dhe agresivë ndaj qytetarëve të thjesht që rropaten për një dokument apo padrejtësi që u bëhet nga pushtetarët lokal.
Shprehin arrogancë të vazhdueshme, të mbysin me propagandë të neviritshme duke dhënë lëmoshë për shtresat në nevojë, por nga ana tjetër punojnë çdo ditë në mbajtjen peng të mijëra qytetarëve të cilët për një shërbim që u takon, duhet të deklarohen si “votues të Rilindjes”.
Kjo është vetëm një pjesë e batërdisë që po ndodh në 60 bashki të vendit të kontrolluara nga pushteti i Ramës i cili po afron gjithnjë e më shumë rreth vetes botën e errët të krimit, të cilëve u ka vënë rreth qafës shiritin e kryebashkiakut.
