Pas hedhjes së shortit të gjysmëfinaleve të Kupës së Shqipërisë, zyrtarët e lartë të klube pjesëmarrëse në këtë kompeticion kanë dhënë përshtypjet e para mbi mundësitë që kanë skuadrat e tyre për tu kualifikuar në finale.
Kështu, një ndër ta është presidenti i Bylisit, Besnik Kapllanaj, i cili duke folur për mediat, e ka vlerësuar kundërshtarin e tyre, Tiranën, por thekson që ekipi I tij i ka të gjitha shanset për të kaluar në finale dhe këtë e ka treguar duke mposhtur disa ekipe të forta për të mbërritur deri këtu.
“Më mirë që ramë në gjysmëfinale me ekipin më të mirë, se sa në finale me tek ndeshje. Normalisht që besoj te finalja e Kupës së Shqipërisë, pasi kemi bërë një rrugë të gjatë, kemi eliminuar rivalë të vështirë si Skënderbeu dhe Laçi. E dimë që Tirana është ekip i fortë, por siç e thashë më parë, më mirë në gjysmëfinale me të se në finale.
Tirana është e fortë, por edhe ne kemi një grup cilësor, po kalojmë një formë të mirë. Normalisht, Kupa është rruga më e shkurtër për të shkuar në Europë, por nuk do të lëmë pas dore as kampionatin. I vetmi zhgënjim që kemi pasur, ka qenë në fillim të vitit, në janar. Atëherë patëm një ecuri jo të mirë, me disa lojtarë larg formës fizike. Me rifillimin e kampionatit po bëjmë paraqitje të mira. Shpresoj të vazhdojmë kështu deri në fund”.
