Gjykata e Posaçme e Apelit vendosi sot të rikthejë për rigjykim në shkallën e parë procesin ndaj Saimir Tahirit dhe Jaeld Çelës, ish-drejtor i Policisë së Vlorës.
Në këtë mënyrë, Apeli ka konstatuar problematika lidhur me gjykimin ndaj Tahirit dhe Çelës.
Gjykata e Shkallës së Parë e kishte dënuar Tahirin me 3.4 vite me shërbim prove, me akuzën e shpërdorimit të detyrës, ndërkohë që Prokuroria kishte kërkuar dënimin e tij me 12 vjet burg, me akuza të rënda lidhur me grupin e Habilajve në trafikun e drogës.
Në shtator të vitit të kaluar ish-Prokuroria e Krimeve të Rënda kërkoi dënimin e tij me 12 vite, ndërsa për shkak të gjykimit të shkurtuar shkonte 8 vite. Gjykata e dënoi Tahirin me 5 vite burg, i konvertuar në 3.4 vite shërbim prove.
Qoftë Prokuroria, ashtu edhe Tahiri, apeluan vendimin. Prokuroria nuk u tërhoq nga kërkesa për dënimin e tij me 12 vite, ndërsa ish-ministri kërkon pafajësi.
Në seancë për herë të parë pas vetëdorëzimit ishte i pranishëm edhe Jaeld Çela.
Seanca e para 2 ditëve u shty, pasi anëtari më i ri i trupës gjykuese të cështjes, Dhimitër Lara kërkoi më shumë kohë për të shqyrtuar dosjen. Lara zëvendësoi gjyqtaren Nure Dreni, e cila u rrëzua nga shkalla e parë e vetingut për shkak të problemeve me pasurinë.
Prokurorët e SPAK Vladimir Mara dhe Dritan Prençi kanë paraqitur akuzat ndaj Tahirit dhe Çelës rreth dy javë më parë.
Prokuroria nuk u tërhoq nga akuzat e ngritura ndaj të pandehurve, ndërsa sërish kërkuan që Gjykata e Posaçme e Apelit të dënojë Saimir Tahirin dhe Jaeld Çelën me 12 vjet burg.
Përballë akuzave të Prokurorisë, Saimir Tahiri dhe avokati i tij, Maks Haxhia, kishin përgatitur një mbrojtje mbi 130 faqe, ku i lexuan ato përballë trupës gjyqësore, që përbëhej nga Albana Boksi, Nertina Kosova dhe Nure Dreni, e cila u zëvendësua nga Dhimitër Lara.
Më 19 shtator 2019, ish-Gjykata e Krimeve të Rënda i dha pafajësi Tahirit për akuzat e trafikimit të narkotikëve dhe grupit të strukturuar kriminal dhe e dënoi atë për veprën penale të shpërdorimit të detyrës.
Trupi gjykues, i përbërë nga gjyqtarët Ardit Mustafaj, Irena Gjoka dhe Flora Hajredinaj, vendosi dënimin e Tahirit me 5 vjet burg dhe përfundimisht 3.4 vjet heqje lire për shkak të uljes së 1/3 nga gjykimi i shkurtuar. Gjithashtu, Gjykata vendosi pezullimin e dënimit me burg, duke e konvertuar atë me shërbim prove.
Në ankimin e kryer në ish-Gjykatën e Apelit për Krime të Rënda, aktualisht shkalla e dytë e Gjykatës së Posaçme, Tahiri kundërshtoi edhe dënimin e dhënë nga Gjykata për “Shpërdorim detyre”. Ankim kreu edhe ish-Prokuroria për Krime të Rënda, duke e kundërshtuar rrëzimin dhe ndryshimin e akuzave.
Tahiri dhe ish-drejtori i Policisë së Vlorës, Jaeld Çela, u akuzuan nga Prokuroria e Krimeve të Rënda për implikim në trafikun e narkotikëve, e kryer nga një organizatë e krimit të organizuar e drejtuar nga vëllezërit Habilaj. Anëtarët e organizatës së drejtuar nga vëllezërit Habilaj, kushërinj të ish-ministrit, u ndaluan në tetor të vitit 2017 nga autoritetet italiane dhe u dënuan në qershor të 2019-ës.
