Grupi i PS miraton kandidaturën e Arben Shehut për Kryetar të KLSH

Grupi Parlamentar socialist ka vendosur sot të miratojë kandidaturën e Arben Shehut për Kryetar i Kontrollit të Lartë të Shtetit. Në mbledhjen e grupit të PS-së, mbajtur pak minuta para seancës së sotme parlamentare, grupi i PS ka vendosur të miratojë dekretin e Presidentit Ilir Meta për zgjedhjen e Shehut në krye të KLSH. Pritet që dekreti i Presidentit të miratohet në Kuvend në seancën e të enjtes, javën e ardhshme.

Meta i propozoi Kuvendit rreth 3 javë më parë kandidaturën e Arben Shehut në postin e kryetarit të Kontrollit të Lartë Shtetit. I propozuari në këtë post vjen nga bota akademike dhe ka në eksperiencë në fushën e jurispridencës.

Gjatë eksperiencës mbi 16-vjeçare në jetën akademike, Dr. Arben Shehu, sipas vlerësimit të bërë edhe nga presidenti, është një ndër njohësit më të mirë të drejtësisë penale. Shehu është diplomuar gjithashtu edhe në fushën e ekonomisë dega “Administrim Biznesi”, me një eksperiencë të gjatë akademike, kërkime dhe shkrime shkencore, por edhe përvojë të spikatur në zbatimin e ligjit, si ushtrues aktiv i profesionit të avokatisë.

Ai është pedagog në Fakultetin e Drejtësisë së Universitetit të Tiranës, te Departamenti i të Drejtës Penale.

LEXO EDHE  Grabitet dyqani në Roskovec

Dr. Arben Shehu, si njohës shumë i mirë i legjislacionit, me njohuritë dhe certifikimet në fushën ekonomike dhe përvojën akademike e profesionale mbi 16-vjeçare, vlerësohet kandidat i përshtatshëm për drejtimin e Kontrollit të Lartë të Shtetit, si një institucion që ka nevojë për një qasje të re në ushtrimin e funksioneve për kontrollin e përdorimit të pasurisë publike dhe vënien para përgjegjësisë të abuzuesve me to.

Në vitin 2005 kryen masterin për Shkenca Penale, ndërsa në 2011 merr gradën Doktor i Shkencave me mikrotezën “Krimi i Organizuar dhe legjislacioni ndërkombëtar”. E në 2011 vazhdon ciklin për titullin Prof.Asociuar në Fakultetin e Drejtësisë në universitetin e Tiranës. Shehu në 2003 mori licencën e avokatit.

Ai ka kryer një sërë trajnimesh, kualifikimesh brenda dhe jashtë vendit, si dhe ka një sërë publikimesh në revista shkencore, apo referime në universitete në Shqipëri dhe në shumë shtete të Europës, si në Bruksel, Vjenë, Roterdam, Bukuresht,etj.

Shehu zotëron në mënyrë të shkëlqyer tre gjuhë të huaj: anglisht, frëngjisht dhe italisht.