Liverpooli është shpallur kampion i Premier League për sezonin 2019-2020.
“Të Kuqtë” arritën të siguronin matematikisht titullin pas humbjes 2-1 të Man.City-t në transfertë ndaj Chelseat, ndeshje e cila sapo është mbyllur. Për “Blutë” fillimisht shënoi Pulisic në minutën e 36-të. Më pas në pjesën e dytë, City arriti të barazonte shifrat në të 55-n me anë të Kevin De Bruyne.
Gjithsesi në minutën e 78-të, Fernandinho prek një top me dorë brenda zonës dhe gjyqtari i takimit Attwell, akordon 11-metërsh për vendasit të cilën e merr përsipër Willian duke realizuar.
Kjo fitore shërbeu si asist pikërisht për Liverpoolin, të cilët shpallen kampionë të kampionatit anglez pas plot 30 viteve. Ekipi i Klopp tashmë numëron 19 tituj kampion, 1 më pak se rekordmenët e Manchester United.
