Në 24 orët e fundit, në Shkodër janë zbuluar 10 raste të reja me koronavirus. Nga raportimet mësohet se 3 nga të infektuarit janë punonjëse në Gjykatën e Apelit në këtë qytet. Dyshohet se ato janë infektuar nga një kolegia e tyre, e cila rezultoi pozitive ndaj Covid-19 4 ditë më parë.
Rastet e tjera deri më tani dyshohet se janë familjarë dhe kontakte të rasteve të mëparshme. Prej ditësh koronavirusi është shtrirë në institucionet shtetërore, si dhe në kompanitë që operojnë me shumë punëtorë dhe që janë kryesisht fasoneri.
Një ditë më parë në Shqipëri u konfirmuan me koronavirus 52 raste, duke e çuar në 2 047 numrin e të infektuarve, mes të cilëve kanë humbur jetën 46 persona.
