Qeveria Rama ka prezantuar dy projekte madhore, hidrocentralin e Skavicës dhe tunelin e Llogarasë që kapin vlerën e 1 miliard eurove.
Përshpejtimi i ndërtimit të tunelit nga qeveria shihet e lidhur me numrin e madh të resorteve turistike të ndërtuara nga Palasa deri në Dhërmi dhe Jalë.
Eksperti i ekonomisë, Pano Soko, i sheh më shumë si premtime fushate, duke deklaruar se Skavicën nuk mund ta bësh asnjëherë me paratë e buxhetit të shtetit.
Pano Soko: Ose do të ketë ndonjë skemë të zhvendosjes së parasë publike në llogari private offshore, ose e kemi filluar shumë shpejt fushatën.Premtime për investime madhore që nuk do të shkojnë asnjëherë. Po kalojmë krizë ekonomike, krizë konsumi, njerëzit po humbasin punën, bizneset e vogla po mbyllen. Qeveria po sillet sikur ka 1 miliard euro dhe nuk ka çfarë të bëjë me to. Po ti lëmë këto investimet e mëdha, Skavicën nuk mund ta bësh asnjëherë me fondet e buxhetit të shtetit. Një skemë si të shkojë leku të familjet a ka? Këtej ikin nga puna kamarierët dhe këtej po fut në punë punëtorë llaçi. Çfarë është kjo? Nuk ka adresim të sinqertë, këta filluan fushatën elektorale.
I ftuar në Rtv Ora, ai thotë se paratë për të dy veprat do të merren borxh.
Pano Soko: Duhet ti marrim borxh, fondet për tërmetin do të jenë të destinuara për tërmetin. Shqipëria në 31 dhjetor 2012 ka pasur 5.9 miliardë euro borxh, me 30 qershor 2020 ka rreth 10.1 miliard euro borxh.Janë marrë diku 4.2 miliard euro pa përmendur koncesionet që janë 2.2 miliard euro.Me këto 4.2 miliard euro çfarë janë bërë përveç rilindjes urbane, by-passi i Fierit.Problemi i Shqipërisë nuk është se merr borxh, por që lekët që marrim borxh shkojnë për gjëra që ose nuk kanë vlerë ose janë shumë të kushtueshme. Stoku i lënë nga kryeministri Berisha ishte 5.9 mld euro, sot bashkë me koncesionet shkojnë 12.3 mld euro.Kush është produktiviteti? Zero, nuk kanë pasur impakt në kompani. Berishës mund ti numerizojmë disa vepra, kësaj qeverie asnjë përveç rilindjes urbane.
Eksperti i ekonomisë ngre shqetësimin për problemin që kemi me eficencën e përdorimit të parasë.
Pano Soko: Nëse marrim një milion euro për të ndërtuar një rrugë, vlera e shtuar në ekonomi duhet të jetë e tillë që taksat që prodhon kjo vlerë e shtuar të jenë të barabarta me këstin, kjo do të thotë se rruga ka arritur të shlyejë veten. Nga 100 mijë euro që kemi për të paguar këst çdo vit duhet të prodhojë 100 mijë euro taksa. Për të prodhuar 100 mijë euro taksa ekonomia që do të shtojë rruga duhet të jenë 400-500 mijë euro. Asnjë kacidhe nga këto që kemi marrë borxh nuk ka arritur të gjenerojë jo vetëm këstet por as impakt.Këtë shoh edhe në çështjen e Skavicës dhe tunelit të Llogarasë, çfarë ekonomie do të sjellë tuneli i Llogarasë? Mund të jetë shumë ide e mirë.
Për Sokon, problemi imediat që ka sot Shqipëria është mungesa e konsumit.
Ai thotë se efektet reale të pandemisë do të shihen në shtator.
Pano Soko: Kemi plagë konsumi, do të jetë më evidente në shtator.Jo vetëm Shqipëria por gjithë bota. Duhet të adresojmë këtë dhe dyti optimizmi se na mbyti pesimizmi. Ekonomia në fund fare është ndjeshmëri. Nëse njerëzit janë pesimistë i mbajnë lekët dhe i gjithë zinxhiri i ekonomisë infektohet.
