Një pacient, i shtruar te spitali Infektiv, i prekur nga koronavirusi ka ndërruar jetë pasditen e sotme. Mësohet se pacienti 62-vjeçar nuk vuante nga sëmundje të tjera. Pacienti ndodhej prej 10 ditësh në gjendje të rënduar shëndetësore, i intubuar.
62-vjeçari është viktima e 45 nga koronavirusi në Shqipëri, që prej shfaqjes së pandemisë.
Aktualisht në spitalin infektiv janë të shtruar 81 pacientë, 10 prej të cilëve në terapi intensive. Raste aktive në vendin tonë janë 790, prej të cilave 366 në Tiranë.
Njoftimi i plotë
Rreth dy javë pas shtrimit në spital, pas 10 ditësh në terapi intensive, i intubuar, një 62 vjeçar nga Tirana ka humbur jetën nga COVID19, megjithë përpjekjet e mjekëve, terapisë medikamentoze intensive, pavarësisht se nuk vuante nga sëmundje bashkëshoqëruese.
Ministria e Shëndetësisë i shpreh ngushëllime familjes së të ndjerit dhe i rikujton qytetarëve rëndësinë që ka respektimi i masave mbrojtëse, pasi referuar ekspertëve të Institutit të Shëndetit Publik, virusi është prezent, ka transmetueshmëri dhe nuk e ka humbur forcën e tij virusale.
Nga fillimi i epidemisë, 45 qytetarë e kanë humbur betejën me COVID19. Aktualisht janë të shtruar mbi 80 pacientë në shërbimin infektiv dhe janë mbi 790 raste aktive me COVID19 në vend.
