Dialogu ndërmjet Serbisë dhe Kosovës i lehtësuar nga Bashkimi Evropian pritet të rifillojë të enjten në Bruksel, kanë konfirmuar për Radion Evropa e Lirë, burime jozyrtare në Prishtinë dhe Bruksel.
Pala kosovare ka shumë të ngjarë të përfaqësohet nga kryeministri i Kosovës Avdullah Hoti.
Ende nuk ka konfirmim kush do të jetë përfaqësuesi i Beogradit zyrtar.
Ky raund do të organizohet përpara se palët të udhëtojnë në Uashington për të marrë pjesë në një proces negociator të ndërmjetësuar nga i dërguari i SHBA-së për dialogun Kosovë-Serbi, Richard Grenell.
Vazhdimi i dialogut në Bruksel, pason vizitën e përfaqësuesit të posaçëm BE-së për dialogun, Mirosllav Lajçak në Prishtinë dhe Beograd.
Lajçak tha në Prishtinë javën e kaluar se ai i dinte datat e dialogut, por se ai do t’i bënte publike ato pas konsultimit me palët. Ai pas bisedimeve me zyrtarët e lartë shtetërorë tha se askush nuk mund t’i ofrojë të ardhme evropiane Kosovës, pos BE-së, andaj sipas tij, blloku evropian nuk mund të lihet anash nga procesi i bisedimeve.
Duke iu përgjigjur një pyetjeje në lidhje me takimin e Kosovës dhe Serbisë në Shtëpinë e Bardhë më 27 qershor, të thirrur nga i dërguari i SHBA-së, Richard Grenell, Lajçak tha se ka dëgjuar për atë iniciativë, “por që ata nuk ishin këshilluar për të dhe nuk komentoj iniciativat e të tjerëve”.
Ndërkohë, shefi i kabinetit të presidentit të Kosovës, Hashim Thaçi, dhe këshilltari i tij kryesor, Bekim Çollaku, ka deklaruar për Radion Evropa e Lirë së zgjidhja e problemeve ekonomike, heqja e barrierave tregtare, lëvizja e lirë e njerëzve dhe e mallrave, si dhe investimet në infrastrukturën rajonale, do të jenë temat kryesore të bisedimeve ndërmjet Kosovës dhe Serbisë, në takimin në Shtëpinë e Bardhë në Uashington, të paralajmëruar për 27 qershor.
Lajçak të hënën po qëndron në Beograd ku është planifikuar të takohet me presidentin serb, Aleksandar Vuçiq.
Kjo raund i bisedimeve në Bruksel do të shënojë rifillimin zyrtar të dialogut, i cili është pezulluar në nëntor të vitit 2018 për shkak të vendosjes së taksës prej 100 përqind të mallrave të importuara nga Serbia dhe Bosnje dhe Hercegovinën nga ish qeveria e Kosovës e udhëhequr nga Ramush Haradinaj. Taksa u shfuqizua më pas, sikurse edhe masat e reciprocitetit që u vendosën nga qeveria e ish-kryeministrit Albin Kurtit.
Muhaxhiri: Ftesa e Brukselit nuk do të ketë efekte të mëdha
Njohësi i çështjeve politike, Artan Muhaxhiri tha për Radion Evropa e Lirë se vazhdimi i dialogut në Bruksel është një veprim i pritshëm nga ana e BE-së, pasi sipas tij, iniciativa energjike amerikane “duket se i zuri në befasi evropianët”.
“Prandaj edhe kjo ftesë për këtë takim kaq të shpejtë është e pritshme pasi në të kundërten BE-ja do të konsiderohej si një institucion tejet pasiv në raport me investimin e madh që është bërë që nga viti 2011 në dialog dhe kjo ftesë e ambasadorit Lajçak është e pritur mirëpo efektet e saj nuk do të jenë shumë të mëdha. Tani SHBA-ja e ka inciviativën dhe ajo do ta diktojë edhe mënyrën e zhvillimit të etapës së fundit të dialogut”, ka thënë Muhaxhiri.
Sipas tij, të dyja iniciativat -evropiane dhe ajo amerikane – qojnë në të njëjtin drejtim, që është etapa e fundit e dialogut mes Kosovës dhe Serbisë.
Muhaxhiri pret që në javët e ardhshme të ketë zhvillime edhe më të hovshme për dialogun Kosovë-Serbi./REL
