Nënkryetari i LSI, Petrit Vasili, në një konferencë për mediat, komentoi opinionet e dhëna nga Komisioni i Venecias, të cilat sipas tij, ishin një goditje e rëndë për Qeverinë.
“Ky konsultim me Venecian ishte i panevojshëm, pasi zbatimi i Kushtetutës nga ana e Presidentit kishte qenë i qartë, i drejtë dhe pa asnjë ekuivok. Komisioni i Venecias dje i vuri vulën disa momenteve kyçe me të cilat Rilindja ka dashur të mbajë peng vendin.
Së pari, është e qartë që Presidenti i Republikës në të gjithë veprimet e tij, ka zbatuar Kushtetutën e Republikës së Shqipërisë dhe çdo vendim për shkarkimin e tij ishte thjeshtë dhe vetëm një tentativë rilindase për të shantazhuar dhe kapur institucionin e Presidentit të Republikës.
Venecia i dha shumë të drejtë Presidentit të Republikës që ai pezulloi procesin për të krijuar një proces të drejtë, të ekuilibruar, proporcional, të zgjedhjes së anëtarëve të Gjykatës Kushtetuese dhe kësisoj asgjësoi dhe ndali puçin antikushtetues të përgatitur me kujdes nga Rilindja për të rrëmbyer dhe kapur Gjykatën Kushtetuese në grushtin e saj.
Venecia sqaroi qartë rolin e ish-kryetarit të Këshillit të Emërimeve në Drejtësi, Adrian Dvorani dhe i quajti në mënyrë të qartë dhe të prerë vendimet e tij si incidente të rënda që krijuan konflikt në mes të institucioneve, pra Dvorani ishte një instrument i qartë në duart e Rilindjes në funksion të puçit antikushtetues për të rrëmbyer Gjykatën Kushtetuese. Njëherazi, jo i vendos vulën përgjegjësisë së rëndë penale që rëndon mbi këtë individ, i cili duke shpërdoruar ligjin, Kushtetutën dhe institucionin e tij, krijoi turbullirat e një premise kushtetuese dhe i shërbeu një skenari që ishte një goditje në kokë e shtetit ligjor në Shqipëri,” tha Vasili.
Në vijim ai theksoi se ndryshe nga pretendimet vërtetë qesharake, mjerane, të tipit Balla, sot SPAK-u, i cili ka në dorë dosjen e Dvoranit e ka të provuar 100% fajësinë e tij dhe nuk ka më asnjë arsye të vonojë dhe të ndalet për të proceduar penalisht këtë person që ka shpërdoruar në mënyrën më të rrezikshme detyrën dhe institucionin e tij në funksion të rrëmbimit të Gjykatës Kushtetuese.
“Pra të gjithë aktorët Dvoran-Kuvend-Ministria e Drejtësisë, e evidentojnë qartë me incidentin e rëndë të Dvoranit si bashkëpunëtor tashmë të kapur në krim. Është fare e qartë dhe Venecia nuk lë asnjë ekuivok dhe jep një përgjigje të prerë, se mospranimi dhe refuzimi i vetëshpalljes së një kandidateje Vorpsi, e cila u betua te Lana ishte një veprim shumë i drejtë i Presidentit të Republikës, një veprim tërësisht kushtetues i tij dhe në këtë mënyrë Venecia rrëzoi dhe përbuzi në mënyrë të paekuivok betimin e Lanës, por njëherazi dhe mazhorancën e Lanës që u bë zëdhënëse e këtyre proceduarave antikushtetuese, provinciale dhe të neveritshme siç është e gjithë konstruksioni politiko-juridik i rilindjes që ka uzurpuar qeverisjen e vendit”, tha Vasili.
