Sherif Kallaku do të largohet nga skuadra e Teutës në përfundim të këtij sezoni. Pritet që sezonin e ardhshëm 22-vjeçari të luajë në kampionatin polak me skuadrën e Slask.
Ndër të tjera gjatë emisionit Pressing në ABC News u mësua se mesfushori do të nënshkruajë për dy vite dhe mbetet të zyrtarizohet gjithçka.
Kallaku rinovoi me Teutën pak kohë më parë dhe durrsakët kanë pranuar ofertën e polakëve. Momentalisht nuk zbulohen shifra, por ajo që dihet ka të bëjë me interesimin e shumë skuadrave për shërbimet e mesfushorit, i cili ka mbajtur edhe shiritin e kapitenit te Shqipëria U21.
Kallaku ka qenë një nga liderët e Teutës këtë sezon, madje është shënuesi më i mirë i skuadrës me nëntë gola. Dëshira e tij për të luajtur jashtë vendit po bëhet realitet dhe Slask do të jetë një stacion i rëndësishëm në karrierën e mesfushorit.
