Është zbuluar emri i autorit që qëlloi mbrëmjen e sotme në Bulqizë ndaj policisë dhe biznesmenit Gëzim Balla.
Ai është Feruzan Shehu dhe është shpallur në kërkim nga policia.
Shehu i kishte vendosur gjobë biznesmenit me anë të një mesazhi ku i shkruante edhe vendin ku duhet të shkonte për ti dorëzuar 10 mijë eurot.
Por biznesmeni e ka denoncuar në polici, e cila e ka shoqëruar deri në vendin ku do të bëhej dorëzimi.
Pikërisht në këtë moment pasi ka pikasur policinë, Shehu ka qëlluar në ajër dhe është zhdukur.
Njoftimi i policisë
‘Policia identifikon dhe vijon kontrollin e zonës për kapjen e autorit të kërcënimit për vënie gjobë ndaj një biznesmeni.
Me datë 19.06.2020, shtetasi G.B, (biznesmen), është paraqitur në ambientet e Komisariatit të Policisë Bulqizë dhe ka bërë kallzim, i cili ka deklaruar që është telefonuar dhe kërcënuar për vënie gjobë nga një shtetas.
Falë reagimit në kohë dhe veprimeve profesionale, Policia identifikoi shtetasin F.Sh, i cili kishte telefonuar dhe kërcënuar shtetasin G.B.
Në vijim të veprimeve për kapjen e autorit, policia ka shoqëruar biznesmenin në vendin ku i kishte kërkuar autori që të paraqitej.
Shtetasi F.Sh, i cili ishte fshehur rreth 500 metra në shpatin e malit, ka qëlluar në ajër dhe është larguar me shpejtësi.
Shërbimet e policisë kanë rrethuar zonën dhe vijon krehja për kapjen e autorit.’
