Zëvendësministrja e Arsimit, Sportit dhe Rinisë, Nora Guga, bëri me dije se fundjavë mund të dalin përgjigjet e provimit të maturës shtetërore të Gjuhës Shqipe dhe Letërsisë.
“Në këto provime ishin 32 mijë maturantë korrigjimi i testit është elektronik kjo na mundëson një kohë më të shpejtë për korrigjimin e tyre. Mendojmë që në fundjave mund të dalin notat e gjuhës së huaj dhe gjuhës shqipe dhe letërsisë. Në vazhdim të ditëve të javës tjetër do të dalin përgjigjet e matematikës dhe lëndëve me zgjedhje. Korrigjimi patjetër do të shpallet , do të publikohen notat e nxënësve, ndërkohë që QSHA bashkë me institucionet e shkollës do të vazhdojnë procesin e tyre që do të dalin me dokumente që nxënësit pajisen në fund ka të bëjë me dëftesën e notave të tre viteve dhe diplomën”, tha ajo në një intervistë televizive.
Provimi i maturës së Gjuhës Shqipe dhe Letërsisë është kontestuar nga maturantët të cilat kanë zhvilluar edhe protesta. Sipas tyre, testi kishte pyetje të palogjikshme dhe pa lidhje me programin që ata kishin marrë më herët nga autoritetet arsimore. Të njëjtin qëndrim kanë shprehur dhe disa akademikë e ekspertë të arsimit.
Autoritetet ndërkohë, kanë mbështetur tezën dhe nuk e kanë pranuar kërkesën e maturantëve për përsëritjen e provimit.
