Napoli mundi mbrëmjen e djeshme Juventusin në finalen e Kupës së Italisë. 90-minutat e kohës së rregullt u mbyllën 0-0 ndërsa trofeu u vendos me anë të gjuajtjes së 11-metërshave aty ku napolitanët u treguan më të saktë.
Pas triumfit të skuadrës së tyre, qyteti i Napolit shpërtheu në festë. Mijëra tifozë napolitanë u mblodhën në sheshet kryesore për të festuar fitoren e kompeticionit të dytë më të rëndësishëm futbollistik në Itali.
Flamuj blu, flakadanë e fansa që këndojnë, qëndruan për orë me radhë jashtë për suksesin e veçantë të Napolit. Festa mori edhe më shumë vlerë pasi përballë, në finale, ishte Juventus një rival i përjetshëm i të kaltërve, dy skuadrat të cilat kanë zhvilluar përballje të tensionuara për dekada me radhë.
Nga ana tjetër, zhgënjimi ishte i qartë në Torino, me rrugët e qytetit të cilat heshtën pas vërshëllimës finale në Olimpico të Romës.
