Skënder Brataj, Drejtori i Urgjencës Kombëtare, tha se shtimi i rasteve me Covid-19 ka ardhur si pasojë e hapjes dhe mosrespektimit të masave nga qytetarët.
Brataj tha se QSUT nuk mund të konsiderohet si vatër infeksioni, ndërsa shtoi se nuk mund të thuhet se Covid-19 ka ulur virulencën.
“Virusi nuk ka ikur, është këtu mes nesh dhe ne duhet të bashkëjetojmë, të respektojmë rregullat”, tha Brataj.
Ai tha se Covid-19 është një virus po aq i rrezikshëm sa ishte në fillim dhe nuk duhet të nënvlerësohet.
“Personat që kanë humbur jetën kanë qenë me sëmundje bashkëshoqëruese. Covid-19 i jep goditjen e fundit pacientëve që vuajnë nga sëmundje të tjera”, tha Brataj.
I pyetur në emisionin Opinion se kur mund të ndodhë karantinimi, Brataj theksoi se kjo mund të ndodhë vetëm nëse ezaurohen shtretërit në spitale, por shtoi se nuk besonte se mund të arrihej në këtë pikë.
“Vatrat e reja po dalin ose në fasoneri, ose në ambiente të mbyllura, nuk kemi ende një rast të infektimit të ambiente të mbyllura”, tha ai.
Sipas Bratajt, çdo gjë që thyen distancimin fizik është e rrezikshme.
“Maskat në ambientet e mbyllura është e detyrueshme. Ngarkesa virale ka rënë, por jo virulence. Lokalizimi aktualisht kërkon mbi 6 ditë, ndërkohë që më përpara ishte 2-3 ditë”, tha Brataj.
Sipas tij, deti dhe dielli ndikojnë pozitivisht te shëndeti i qytetarëve.
