Premier League është kampionati i radhës që rifillon sezonin e saj të ndërprerë përshkak të përhapjes së pandemisë së coronavirusit.
Gjithçka rifillon në orën 19:00 me sfidën ndërmjet Aston Villas dhe Sheffield United por të gjithë sytë do të jenë në ndeshjen e orës 21:15, aty ku Manchester City pret në “Etihad Stadium” Arsenalin.
Lufta për titullin kampion në Angli nuk ekziston, pasi Liverpool-i kryeson me 25 pikë avantazh ndaj City-t në vendit të dytë, por që gjithsesi kjo është një ndeshje për tu fituar nga “Qytetarët” të cilët do të synojnë ta mbyllin kampionatin me një seri rezultatesh pozitive.
Nga ana tjetër situata nuk është aspak pozitive te Arsenali, aty ku “Topçinjtë” e Londrës vuajnë mungesën e rezultateve dhe për më tepër e shohin veten larg zonës europiane.
Në “Etihad Stadium” Arsenali ka plot 3 vite që largohet me kokën ulur, fitorja e fundit në kampionat daton në janar të 2015-ës. Në kampionat në ndeshjet në transfertë topçinjtë e Londrës e kanë harruar shijen e fitores, 5 barazime dhe vetëm 1 fitore ndaj West Ham-it.
Sfida mes dy skuadrave ka shumë pikëpyetje ku e avantazhuar do të jetë ai ekip që do të ketë përgatitjen më të lartë fizike duke parë edhe periudhën e gjatë ku skuadrave u ka munguar aktiviteti fizik dhe për më tepër ritmi i lartë që të ofron një ndeshje futbolli.
