Vala e dytë e infeksionit të virusit Covid-19 me rekord rastesh të reja të regjistruara çdo ditë shihet me shqetësim nga epidemiologët.
Taulant Muka, mjek epidemiolog dhe drejtues i grupit kërkimor në Universitetin e Bernës në një intervistë për emisionin “Ditë e Re” në Rtv Ora thotë se qeveria ndoqi një strategji të gabuar me izolimin e ekstrem të popullatës në një periudhë kur numrat ditorë nuk e justifikonin një masë të tillë.
Gjithçka në gjykimin e tij ndodh sepse mungon ekspertiza, madje edhe në Komitetin Teknik të Ekspertëve mbi situatën e COVID-19.
Taulant Muka: Masat duhet të kishin filluar të merreshin sot dhe 2 muaj e gjysmë më parë për një luftë që nuk e pamë dhe për më tepër jo në atë ekstrem që pamë në Shqipëri. Kjo fatkeqësisht ndodh se edhe në Komitet mungon ekspertizë epidemiologjike. Dje po dëgjoja një ekspert të komitetit që thoshte ujërat e ëmbla transmetojnë infeksionin, nuk e di në cilën fantazi e kishte parë këtë fakt shkencor. Vazhdojnë të bëjnë të njëjtat gabime duke çakorduar popullin duke mos bërë reagimet e duhuara në një situatë që ne kemi shumë nevojë.
Sezoni turistik ka filluar dhe Muka qetëson qytetarët se nuk ka prova shkencore që virusi mund të transmetohet përmes ujit të kripur të detit nga njëri person te tjetri.
Taulant Muka: Deri tani nuk ka asnjë fakt shkencor që virusi transmetohet përmes detit.Nëse je ngjitur me një person në det dhe kollitesh përballë atij sigurisht që atij mund ti transmetohet infeksioni. Në ujë jo.
Një debat global ka edhe me mbajtjen e maskave. Sipas Mukës, ato bëhen të detyrueshme për personelin mjekësor, ndërsa qytetarët duhet ti mbajnë në ato ambjente ku dendësia e njerëzve është e lartë, si në rastin e urbanëve.
Taulant Muka: Ka shumë diskutime lidhur me maskat.Sot nuk ka fakte të forta shkencore sa i përket përdorimit të maskave për Covid. Fakt është që në qendrat spitalore po, maskat duhen përdorur, gjithë personeli mjekësor duhet të përdorë maskat në ambjentet spitalore. Gjithashtu nëse je në një urban ku ka dendësi të qytetarëve sigurisht që maskat janë të rekomanduara sepse intensiteti është i lartë.Në Zvicër nuk mbajmë maska, na rekomandohet vetëm kur kemi dendësi të lartë në një ambjent të caktuar dhe kemi më shumë se një muaj e gjysmë ku nuk ka më shumë se 20 raste dita edhe pse numri i testimeve është i lartë.
E ndërsa Ministria e Shëndetësisë e lidh valën e dytë të virusit me mosrespektimin e masave nga qytetarët, Muka thotë se problemi fillon nga lart-poshtë dhe jo anasjelltas.
Taulant Muka: Përgjegjësia është kolektive në këtë raste, qytetarët duhet të vazhdojnë të respektojnë masat e distancimit fizik, të ulin lëvizjet kur nuk janë të domosdoshme. Nëse kanë mundësi të punojnë nga shtëpia, le të punojnë nga shtëpia në këtë fazë ku jemi sot. Në momentin kur ka rënë besimi në qendrën spitaliore universitare ku supozohet të jetë ajka e shoqërisë shqiptare në mjekësi, ku personi mjekësor atje nuk mban maska, ku para një muaji artikulonte se virusi na la shëndenë, vera dhe temperaturat e larta do të na ndihmojnë sigurisht që do të shikosh edhe këtë papërgjegjësi edhe në shoqëri. Janë të lidhura gjërat. Mendoj se kemi një popull shumë të disiplinuar, qëndruan 2 muaj e gjysmë në izolim ekstrem. Nuk e ka bërë asnjë popull tjetër kur numrat nuk e tregonin atë gjë. Nëse fitohet besimi në popull dhe tregohet përgjegjshmëri nga politika jam i sigurt se edhe shqiptarët arrijnë të respektojnë masat. Por duhet të jetë një veprim i përgjithshëm dhe i gjithanshëm.
