Bernardo Silva thotë se debati se kush është më i mirë midis Lionel Messi dhe Cristiano Ronaldo është “jo i diskutueshëm” – sepse fansat duhet vetëm t’i shijojnë ata të dy.
Lojtari i Manchester City-t luan në një skuadër me Ronaldos për kombëtaren e Portugalisë, me dyshen që fituan së bashku turneun e parë të Ligës së Kombeve.
Silva thotë që përvoja e të stërviturit dhe të luajturit përkrah sulmuesit të Juventusit ka qenë e veçantë për të duke e lavdëruar etikën e punës të CR7-tës jashtë fushe dhe brenda saj.
“Do të jetë diçka e veçantë dhe unike për t’ua thënë fëmijëve dhe nipërve të mi se isha në gjendje t’i jepja disa asiste Ronaldos”. – tha Silva për “BBC Sport”. – “Ai është një shembull në fushë. Me Portugalinë stërvitemi në mëngjes. Pasdite, të gjithë luajmë letra ose “PlayStation”, vetëm ai shkon në palestër. Në momentet e mëdha, kur i duhet më shumë kombëtares, ai është gjithmonë aty”.
Për sa i përket debatit se kush është më i mirë, Messi apo Ronaldo, Silva nuk dëshiron të bëhet pjesë e tij: “Është një debat, që nuk mund të diskutohet. Unë mendoj se duhet të ndihemi të privilegjuar që jemi në gjendje t’i shohim të dy, në të njëjtën kohë, së bashku. Ata janë dy nga lojtarët më të mirë ndonjëherë, në mos më të mirët”.
