Komisioni Qendror i Zgjedhjeve ka marrë vendimin për kryebashkiakun e Matit, Agron Malaj. Me 5 vota pro, KQZ ka vendosur që Malaj nuk përfshihet në kushtet e ndalimit të ushtrimit të detyrës.
Komisioni Qendror i Zgjedhjeve shqyrtoi sot rezultatin e verifikimit të Prokurorisë së Përgjithshme për Malajn, në zbatim të ligjit nr. 138/2015 “Për garantimin e integritetit të personave që zgjidhen, emërohen ose ushtrojnë funsione publike”.
Në dokumentin e Prokurorisë, thuhet se për Malaj nuk rezulton të ketë indicie apo të dhëna a rrethana, fakte të bëra publike apo informacion, për: Veprimtari kriminale të kryer jashtë territorit të Republikës së Shqipërisë; Urdhër kërkimi ndërkombëtar lidhur me kryerjen e e ndonjë vepre penale prej tij; Marrjen e ndonjë mase dëbimi ndaj tij; Përdorimin e gjeneraliteteve të tjera.
Në muajin janar, Partia Demokratike publikoi dënimin e Agron Malajt për armëmbajtje pa leje, duke i kërkuar Prokurorisë së Përgjithshme verifikimin e të kaluarës të ish-gardistit Agron Malaj, që sot është kryetar bashkie në Mat i dalë nga zgjedhjet e 30 qershorit dhe shkarkimin e tij nga detyra.
Sipas dokumentit të publikuar nga PD, më 7 tetor të vitit 1999, Agron Malaj është dënuar me vendim të formës së prerë nga Gjykata e Matit me 10 muaj burg për “plagosje me dashje” dhe “mbajtje pa leje të armëve luftarake”.
