Fituesi i Topit të Artë në vitin 2018, Luka Modriç ka dhënë së fundmi një intervistë të gjatë për “Gazzetta dello Sport”.
Nënkampioni i botës me Kroacinë, ndër të tjera ka folur për ish-shokun e skuadrës te Real Madrid, Cristiano Ronaldo. Modriç kishte vetëm fjalë të mira për portugezin, ku pranoi se largimi i tij pati një efekt tepër negativ te “Los Blancos”.
“Te Real Madridi, që prej ikjes së tij kemi humbur golat dhe karakterin. Cristiano gjithmonë dëshiron të fitojë, ai na motivonte dhe na bënte të reagojmë. Ai ka një zemër të madhe, është gjithmonë i gatshëm t’i ndihmojë ata që kanë nevojë”.
Në fund, ish-“Topi i Artë” kurorëzon Kylian Mbappé si “mbretin” e së ardhmes në futboll por thekson që për ta bërë këtë ai duhet të luajë jashtë kampionatit francez, në një vend ku konkurrenca të jetë më e madhe.
“Mbappé ka gjithçka për të dominuar skenën e futbollit botëror, por unë mendoj se për të bërë kapërcimin cilësor duhet të shkojë në një kampionat, ku skuadra e tij nuk fiton aq lehtë. Unë shoh potencial të madh edhe te Vinicius, më pëlqejnë De Bruyne dhe Sterling”.
