Të paktën 9 raste të reja janë konfirmuar sot si të prekur me Covid-19 në Vlorë. Mësohet se pacientët e rinj janë kontakte apo familjarë të rasteve të mëparshme.
Vlora ishte një nga qytetet më pak të prekura nga Covid-19 në kulmin e pandemisë, por duket se në ditët e fundit ka një shtim rastesh. Në fillimin e pandemisë në Vlorë u identifikuan 5 raste, më pas për disa javë nuk pati pacientë të prekur nga koronavirusi, deri më 11 qershor, kur u identifikua një qytetar që punonte si bojaxhi në Himarë.
Ai u paraqit në poliklinikën Qendrore në Vlorë dhe pas tamponit, rezultoi pozitiv ndaj koronavirusit. Dyshohet se i prekuri kishte pasur kontakt me një person nga Tiranë gjatë kohës që ka punuar në Himarë dhe më pas e ka marrë virusin.
Më pas u konfirmuan edhe familjarë të bojaxhiut si dhe një vatër e re. Me 9 rastet e zbuluara së fundmi, në Vlorë, numri i pacientëve me Covid-19 shkon në 15 persona, nga 6 që ishte dje.
Një ditë më parë, ISHP deklaroi se pas 270 testeve janë konfirmuar 48 raste me Covid-19, 24 prej të cilave ishin në Tiranë.
Qytetet më të prekura nga Covid-19, referuar shifrave zyrtare të ISHP-së mbi pacientët aktivë janë Tiranë 220, Shkodër 45, Krujë 40, Kamëz 26, Durrës 19 qytetarë.
