Pas ndeshjes së djeshme mes Juventusit dhe Milanit, ku bardhezinjtë e Sarrit arritën të kalonin në finale, mbrëmjen e sotme në orën 21:00 zhvillohet gjysmëfinalja tjetër e kthimit në Kupën e Italisë mes Napolit dhe Interit në “San Paolo”.
Ekipi i drejtuar nga trajneri Gennaro Gattuso nis aktin e dytë të kësaj gjysmëfinaleje tepër i favorizuar, duke marrë në konsideratë rezultatin e ndeshjes së vajtjes, që u mbajt në Milano më datë 12 shkurt.
Në “San Siro” përpara 59.600 spektatorëve diferencën e bëri pikërisht goli i vetëm i ndeshjes i shënuar nga mesfushori spanjoll Fabian Ruiz në 57’, kështu që në duelin e kthimit ekipi vendas ka luksin për të luajtur për dy rezultate.
Shumë gjëra janë të paqarta dhe në një situatë të tillë të pazakontë natyrisht pritet të influencojë ndjeshëm pikërisht forma fizike me të cilën do të paraqiten futbollistët e këtyre dy skuadrave, për më tepër ndeshja do të luhet pa praninë e spektatorëve.
Për sa i përket mungesave, për Napolin do të mungojnë Kevin Malcuit dhe Manolas të dy të dëmtuar ndërsa nga ana tjetër, Conte, do të ketë të gjithë lojtarët në dispozicionin e tij.
