Publikohen pamjet e momentit kur u vra në atentat Hekuran Billa, 40 vjeç. Ngjarja e rëndë ndodhi mbrëmjen e të enjtes në një zonë mjaft të populluar të Tiranës, tek Komuna e Parisit, fare pranë një qendre tregtare.
Në video duket makina e atentatorëve që i del në krah makinës tip BMW X6 të Billës dhe pasi e qëllon, kjo e fundit përfundon e përplasur me një bordurë në trotuar si dhe merr përpara edhe disa automjete të tjera.
Më pas, makina e autorëve shihet të largohet nga skena e krimit duke manovruar mbrapsht. Autorët janë kthyer nga rruga që erdhën, duke marrë në drejtim të Unazës së Madhe, për të djegur më pas makinën në Pezë.
Vendi ku u dogj makina në Pezë
Nga situata, edhe makinat e tjera që u ndodhën në vendin e ngjarjes në nxitim për t’u larguar shihen që përplasen me njëra-tjetrën. Gjithashtu qytetarë kalimtarë janë larguar me vrap pasi kanë parë skenën e asaj që ka ndodhur. Në vendin e ngjarjes nuk janë dëgjuar të shtëna me armë zjarri, pasi autorët kanë përdorur silenciator.
Hekuran Billa ka marrë plumba në kokë dhe në trup, të cilët i kanë shkaktuar vdekjen e menjëhershme. Në pamjet e siguruara nga mediat më herët, dukej 40-vjeçari teksa nxirrej nga automjeti i tij, ndërsa në kokë ishte i gjakosur, ndërsa në vesh kishte kufje.
Video është publikuar nga A2.
