Në 24 orët e fundit janë evidentuar 31 raste me Covid-19, një shifër kjo e lartë, por më e ulët se ato të raportuara në 72 orët e fundit.
Mësohet se nga 300 testime të kryera kanë rezultuar pozitivë me Covid-19 31 raste, 8 prej të cilëve në Tiranë.
Harta e të prekurve nga Covid-19 zgjerohet me 6 raste në Pukë, ndërkohë që në Vlorë dhe Shkodër janë evidentuar nga 5 raste.
Referuar shifrave në Elbasan, Durrës dhe Krujë janë zbuluar në total 6 raste, nga dy për secilin qytet.
Ndërkohë në Lushnje është evidentuar 1 raste me koronavirus.
Dita me numrin më të lartë të rasteve të zbuluara me koronavirus është 11 qershori, ku sipas shifrave zyrtare u raportuan 44 të prekur. Dy ditë më parë u raportuan 42 raste, ndërsa në 72 orët e fundit vetëm në Tiranë janë raportuar 50 të prekur nga Covid-19.
Një nga vatrat kryesore të përhapjes së Covid-19 është QSUT, nga ku janë raportuar si të prekur jo vetëm personel shëndetësor, por edhe pacientë.
Rritja e rasteve me Covid-19 është e lidhur jo vetëm me çlirimin nga masat shtrënguese, por edhe me rritjen e numrit të testimeve.
