Autoritetet e Guardia Di Finanza në Itali kanë ekzekutuar operacionin e koduar “Beached” i cili ka çuar në shkatërrimin e një grupi trafikantësh që trasponrtonin drogë me skafe e gomone përmes rrugës së Adriatikut.
17 persona janë vënë në pranga banues në territoriet e Brindisi, Taranto, Roma, Arezzo, Rimini, Forlì dhe Matera. Burimet e RTV Ora kanë konfirmuar se 5 prej tyre janë shtetas shqiptarë, ndaj të cilëve u vendos masa e arrestit shtëpiak. Ndërkohë 4 shqiptarë të tjerë janë shpallur në kërkim.
Tre prej tyre figurojnë të jenë kthyer ne Shqipëri për shkak të Covid-19 dhe nuk kanë udhëtuar më drejt Italisë. Ndërsa shqiptari i katërt i shpallur në kërkim ndodhet në SHBA ku ka udhëtuar duke u nisur nga Shqipëria.
Hetimet e operacionit të nisura më 2017 nga reparti i Guardia di Finanzia në Brindizi kanë dokumentuar një trafik të madh të marijuanës përmes Andriatikut nga Ballkani drejt brigjeve italiane përmes gomoneve e skafeve. Pasi mbërrinte në brigjet italiane droga shpërndahej në provincat e Brindizit e Tarantos si dhe rajone të tjera qëndrore e veriore italiane.
Gjatë hetimeve janë sekuestruar 4000 kg marijuanë, 0,5 kg kokainë, 27 mijë euro cash, 1 gomone, 3 automjete, 1 motorr dhe armë.
Janë arrestuar në flagrancë 6 korrierë droge dhe 32 të tjerë janë denoncuar.
Sipas RTV Ora, autoritetet e Guardia di Finanza informojnë se operacioni është ekzekutuar falë bashkëpunimit me përfaqësuesve dhe autoriteteve policore shqiptare në Bari.
