Nga BoldNews.al
Prokurori i Tiranës, Blerim Tominaj, pritet të përballet me procesin e Vetingut, përballë trupës së përbërë nga Genta Tafa (Bungo), Etleda Çiftja, Suela Zhegu.
Tominaj është një prokuror me karrierë të gjatë në sistemin e drejtësisë. Ai ushtronte funksionet pranë Prokurorisë për Krime të Rënda, derisa ajo u shkri për t’i lënë vendin Prokurorisë Speciale, SPAK.
Prokurori Tominaj rezulton të jetë pronar i dy lokaleve dhe një apartamenti. Njërin prej lokaleve, me vlerë 170 mijë euro, ai deklaron se e ka përfituar nga një kontratë sipërmarrjeje me kompaninë “Lim-Em”, në këmbim të truallit të përfituar me dëshmi testamentare.
Nëpërmjet kësaj kontrate, Tominaj i shtohet listës së të tjerë prokurorëve që kanë krijuar raporte financiare me pronarët e kompanisë ‘Lim-Em”, Ardian dhe Shkëlqim Beshiri.
Donika Prela dhe “Lim-Em”
“Boldnews.al” ka raportuar rreth një vitë më parë, në mënyrë ekskluzive, se ish-drejtuesja e Prokurorisë për Krime të Rënda, Donika Prela, kishte blerë një apartament me vlerë 110 mijë euro në një godinë të ndërtuar nga shoqëria “Lim-Em”.
Referuar të dhënave publike, rezultonte se Prela e kishte blerë apartamentin me një çmim shumë më të lirë se sa ishte vlera e tregut.
Për më tepër, raporti ndërmjet Donika Prelës dhe kompanisë së vëllezërve Beshiri u shoqërua me dyshime të forta për konflikt interesi.
Rreth 3 muaj para se Prela të blinte apartamentin tek ‘Lim-Em”, ajo, në cilësinë e drejtueses së Prokurorisë së Durrësit, kishte vendosur nën përgjim një ndër vëllezërit Beshiri, në kuadër të hetimeve të nisura ndaj ish-Prokurorit të Përgjithshëm, Adriatik Llalla.
Ish-numri një i Akuzës u vendos nën hetim për akuzat e korrupsionit dhe pastrimit të parave. Hetimi, i cili fillimisht u regjistrua në Durrës, kaloi tek Krimet e Rënda, sapo drejtimin e kësaj strukture e mori Donika Prela.
Në kuadër të veprimeve hetimore, prokuroria e Durrësit fillimisht dhe më pas ajo e Krimeve të Rënda, mbajtën nën përgjim Llallën dhe një prej vëllezërve biznesmenë.
Prokuroria e drejtuar nga Prela në atë kohë ngriti dyshime mbi një transaksion të kryer në vitin 2016 ndërmjet ish-kryeprokurorit Adriatik Llalla dhe shoqërisë “Lim-Em”.
Llalla ishte pronar i një sipërfaqeje toke në zonën e Mjull-Bathore, të blerë në vitin 2007 me vlerë rreth 2 milionë lekë. Rreth 10 vjet më pas, ai ia shet këtë sipërfaqe toke kompanisë “Lim-Em”, për vlerën e 249 mijë eurove.
Diferenca mes çmimit të blerjes në vitin 2007 dhe shitjes në vitin 2016, pavarësisht se mes dy veprimeve qëndron një distancë kohore 10-vjeçare, u konsiderua e dyshimtë nga prokuroria e Durrësit, e cila në Mars 2018 nisi hetimet ndaj Adriatik Llallës, tre muaj pasi ai ishte larguar nga detyra.
Për të zbuluar më shumë të dhëna, prokuroria e Durrësit, e drejtuar në atë kohë nga Donika Prela, urdhëroi vendosjen nën përgjim të Llallës dhe një prej vëllezërve Beshiri.
Pak javë pas realizimit të përgjimeve, konkretisht në Qershor 2018, Donika Prela realizon blerjen “e leverdisshme” pikërisht në pallatin e ndërtuar nga kompania “Lim-Em”.
Këto të dhënat, tejet të dyshimta, nuk u morën në konsideratë nga Komisioni i Pavarur i Kualifikimit, i cili vendosi konfirmimin në detyrë të Donika Prelës, pavarësisht problematikave të theksuara, sidomos në kriterin e pasurisë dhe integritetit profesional.
