Nga Boldnews.al
Është kulmi i rritjes së kanabisit. Policia duhet të ishte në aksion, mes arave të mbjella nëpër kodra dhe male, por vëmendjen e kanë përqëndruar tjetërkund, në plazhe dhe brigje lumenjsh. “Problematike është krimi mjedisor. Për të çliruar këto asete nga ndërhyrjet e papërgjegjshme njerëzore, nga dëmet e mëdha që i bëjnë. Kanë filluar goditjet e këtij fenomeni, por po goditen shumë njerëz, qindra miliona gjobë që po i vihet bizneseve që hedhin pa asnjë lloj kujdesi në lum çdo gjë që i tepron.
Kjo kërkon bashkëpunim që ky fenomen të marrë fund dhe të kontribuohet për cilësinë e turizmit”-the dje ministri i Brendshëm Sandër Lleshaj, duke shtuar edhe se do të ngrihet një Task-Forcë edhe për vijën bregdetare. Krimi mjedisor nuk është një fenomen i muajve të fundit, por prej vitesh e dekadash, por shkëputja e vëmendjes nga fenomeni i kanabisit dhe zbritja e policisë nëpër plazhe dhe lumenj më shumë i ngjan një strategjie për të lënë të qetë rritjen e drogës.
Kjo është një periudhë që korespondon “çuditërisht” me sigurimin e kanabisit dhe zgjedhjet e përgjithshme parlamentare. Por një problem serioz është edhe se këtë vit, ndryshe nga 24 vitet e shkuara, avioni special i “Guardia Di Finazza” që kryen monitorim nga ajri për evidentimin e parcelave me kanabis nuk do mbërrijë në vendin tonë. “Kemi dronë special”-tha ministri Lleshaj, duke “justifikuar” mungesën e kërkesës nga pala shqiptare për mbërritjen e avionit nga vendi fqinj.
Në fakt, dronët që disponon policia, edhe ata me numër mjaft të kufizuar, kanë një rreze të shkurtër veprimi dhe nuk mund të shërbejnë për zbulimin e parcelave ma kanabis në zona të thella malore. Një nga mundësitë është verifikimi në terren, por duke e kaluar policinë nga lufta kundër drogës në “luftën kundër ndotjes”, është një strategji e djallëzuar, e cila në fund kur sigurohen të korrurat e kanabisit në shtator dhe tetor, rrezikon ta kthejë vendin në një hambar droge.
Çdo raport konfidencial i policisë, por edhe të dhëna të siguruara në terren flasin për një riorganizim të frikshëm të grupeve kriminale të cilët po mbjellin drogë masivisht. Dy janë motivet e rikthimit në gjurmët e vjetra të kanabisit: Rritja e çimit të marijuanës dhe viti elektoral. Kështu ndodhi edhe në vitin 2016 ku njihet si periudha më e frikshme kur vendi u mbyt në drogë, çka bëri që kryesisht Italia dhe Greqia të nxirrnin në zonat kufitare një numër të madh efektivësh të policisë, madje edhe ushtrisë për të frenuar sadopak drogën “Made in Albania”.
“Çunat problematic” e dinë mirë sit ë veprojnë, pasi sigurojnë paranë nga kultivimi dhe më pas shitja e kanabisit një pjesë të atyre fitimeve e “derdhin” në fushatë zgjedhore, për të mbajtur në pushtet këtë qeveri që u siguron bereqet nga trafiku i drogës.
