Takimin Rama-Meta në mbledhjen e Këshillit Kombëtar të Integrimit, analisti Fatos Lubonja e quajti akt teatral. Në një emision televiziv, Lubonja u shpreh se kryeministri dhe Presidenti, nëse do ishin njerëz normalë, me të gjithë ato që kanë thënë ndaj njeri-tjetrit, nuk do të takoheshin.
Ai tha se të dy i kanë humbur ndjenjat humane dhe janë kthyer në makina pushteti.
”Ajo që lë si me thënë një lloj ndjesie, se unë, nuk kemi qenë aty, kemi parë disa foto është një lloj tjetërsimi që i bën njeriut politik, pushteti. Jo se politika nuk duhet ta njohi moralin, principet, por shpesh herë sidomos në vende si ky i yni, këto të lënë përshtypjen sikur këta njerëz kanë harruar të jenë njerëz. Po të kesh parasysh se çfarë i kanë thënë njëri- tjetrit, nuk flisnin më po të ishin njerëz normalë. Politika të fut në këtë Teatër. Por jo vetëm kjo, por kanë humbur disa ndjesi, si urrejtja. Që urren një njeri, apo neveri, që të lind nga sjelljet e tij, nga mashtrimet, gënjeshtrat. Këto sikur janë zhdukur. Janë në skenë. Edhe kur bërtasin, duket sikur është Teatri për publikun, jo se kanë problem me ndërgjegjien e tyre. Ky teatër ka dëmtuar politikën. Në 2013 thoshte që do rikonstruktoj Teatrin, më pas shkon dhe e prish për kulla. Ndërsa këta janë për teatër, kanë kohë që e luajnë”, tha Lubonja në News 24 pasi iu kërkua të komentonte fotot e takimit mes Ramës e Metës.
“E dyta është fakti që nuk ka drejtësi. Se po të kishim disa njerëz si këta nuk do të takoheshin. Kur shkon drejtësia do ishte në rolin e të dënuarit. Dhe kjo është një kotësi, teatër, që jo vetëm i përçohet qytetarëve por edhe i formaton të sillen kështu, pra papërgjegjshmëri. Mendimi im është që, ka një rivalitet, pasi hipokrizi është kjo që bëjnë. Por mbrapa, tregon dualizmin e njeriut, që ka anë pozitive dhe negative. A do ndikojë në politikë? Padyshim do ndikojë për të rritur një forcë të re që kërkon të lindi por gjithmonë ngelin në shpërngej, që thonë këta janë bashkë, janë një palë. Kjo është njëra anë. Unë nuk them që ka vetëm anë negative, se nuk do bëjmë luftë civile. Duhet drejtësia të veprojë. Se nuk do zihen me grushta. Teatër shqiptar është, banal”, shtoi Lubonja.
