Ambasadorja amerikane Yuri Kim tha mbrëmjen e sotme, pas arritjes së marrëveshjes mes pozitës dhe opozitës për reformën zgjedhore, se jemi shumë të kënaqur për atë që u arrit.
Diplomatja amerikane tha se të gjitha palët kanë dhënë kontributet e tyre, por edhe kanë hequr dorë nga diçka.
“Edhe e bënë këtë sepse Shqipëria fiton nga kjo. Disa do e kritikojnë këtë marrëveshje se ajo nuk është aq sa duhej, por duke e parë në një këndvështrim më të gjerë, atëherë të gjithë do e mbështesin atë.
Sa i përket SHBA, ne jemi krenarë për këtë marrëveshje dhe ju mbështesim në rrugëtimin drejt BE”, tha Kim.
Ndërsa ambasadori i BE-së, Luigi Soreca, tha se e mirëpresim këtë marrëveshje. “Ne e kemi pasur këtë marrëveshje prej të mërkurës, por opozita e bashkuar, kërkoi të rishikonte formulën e depolitizimit të komisioneve. Mazhoranca qeverisëse e pranoi marrëveshjen. Në emër të BE mund tju them se pas kësaj marrëveshjeje Shqipëria është më pranë, pasi një prej kushteve do të përmbushet së shpejti”, tha Soreca.
Ambasadori i Britanisë së Madhe, Duncan Norman, e konsideroi një ditë të mirë në arritjen e marrëveshjes.
“Të gjithë hoqën dorë nga diçka dhe kjo bëri që marrëveshja të arrihej. Ky është një mesazh për politikën në Shqipëri. Kjo marrëveshje është një hap përpara përsa i takon negociatave me BE dhe përsa i takon zgjedhjeve në Shqipëri. Megjithatë ky është vetëm fillimi, pasi gjithçka do të varet nga zbatimi”, tha diplomati britanik.ç
