Kreu demokrat Lulzim Basha ka zhvilluar pasditen e sotme një takim me disa nga drejtuesit e partive opozitare.
Mësohet se në takim ishin të pranishëm kryetarja e LSI-së Monika Kryemadhi, ai republikan Fatmir Mediu dhe kreu i PDIU-së, Shpëtim Idrizi. Në takim kanë munguar kreu i LZHK, Dashamir Shehi, ai i PAA, Agron Duka, i PDK, Nard Ndoka dhe i PBDNJ, Vangjel Dule.
Takimi është në vijim të konsultimeve që kreu demokrat po zhvillon me ekspertë zgjedhorë të opozitës dhe parti aleate lidhur me konsensusin për reformën zgjedhore.
Një ditë më parë, Ambasadorja e SHBA në Tiranë, Yuri Kim, iu drejtuar kreut demokrat me një mesazh për të pranuar marrëveshjen, duke u shprehur se topi dhe e ardhmja janë të duart e tij.
Kim tha se është bërë një progres i madh lidhur me reformën zgjedhore, ndërsa falenderoi palët për lëshimet që kishin bërë, veçanërisht partinë qeverisëse.
Por kreu demokrat pak minuta pas Ambasadores Kim tha se ka mbetur pa u zgjidhur edhe një çështje, që ka të bëjë me administrimin e procesit zgjedhor, apo Komisionet Zgjedhore. Ende nuk dihet nëse opozita e bashkuar dhe kreu i PD-së Lulzim Basha, do e pranojnë ose jo marrëveshjen e cila duket se mbështetet nga 3 ambasadorët, Yuri Kim, Duncan Norman dhe Luigi Soreca.
Formula e funskionimit të Komisioneve Zgjedhore duket se është çështja që po mban palët larg, ndërsa raportohet se opozita e bashkuar ka kërkuar që në rast se identifikimi biometrik nuk funksionon, atëherë komisionet zgjedhore të mos jenë të depolitizuara, por me përfaqësim politik.
Burime nga opozita shprehen se ky mbetet një kusht, i cili duket se nuk pranohet nga mazhoranca, e cila pasi pranoi identifikimin biometrik për të gjithë zonat zgjedhore, ka rënë dakort për depolitizimin e komisioneve zgjedhore.
Më herët Basha gjithashtu ka pasur një takim me ambasadorin gjerman, i cili nuk ka qenë pjesë e Trojkës së Ambasadorëve, që negociuan Këshillin Politik, por ishte sot pjesë e takimit të Ambasadorëve të BE, SHBA dhe Britanisë së Madhe që u mbajt në selinë e Delegacionit të BE-së në Tiranë.
