Ish-presidenti Bamir Topi ka reaguar lidhur me deklarimet e Ambasadores amerikane Yuri Kim, e cila mbrëmjen e së mërkurës, tha se “topi është në fushën e Lulzim Bashës“.
Topi tha kjo deklaratë nënkuptonte se Bashës i është shënuar gol dhe mund ta nisësh lojën nga porta e tij.
“Së pari nuk do kisha kurajo të perifrazoja një metaforë të ambasadores. Ajo i takon autorit ta interpretojë. Unë i kam parë zhvillimet në dinamikë.
Kryeministri sot duke perifrazuar metaforën për topin te Lulzim Basha, përdori shumë variante.
Po ta zbërthejmë metaforën në mënyrë korrekte ata nuk thanë zoti Basha e ke topin dhe gjuaje penalltinë por tha se topi është në fushën e zotit Basha.
Interpretimi im është se të kanë shënuar gol dhe duhet të fillosh lojën nga mesi i fushës. Shikoj një pozicion tepër të vështirë të parazgjedhur ndoshta në mungesë të vizionit politik të PD”, tha Topi për ABC News.
Topi e quajti të gabuar deklaratën e Bashës për të folur në emër të shqiptarëve, duke theksuar se grupimi i vetëm që ai mund të përfaqësojë në fjalën e tij është Partia Demokratike.
“Basha ka pasur të gjithë kohën e nevojshme për t’u bërë zoti Basha.
Shoh paqartësi në vizionin politik. Unë nuk e kam bindjen por nuk besoj se profili politik dhe qytetar i Bashës të jetë shumë ekstremist.
Por kam bindjen që edhe për faj të tij që tashmë sa vjen e rritet dhe sa më shumë kalon koha askush nuk e justifikon se vendimmarrja nuk është vetëm e tij. Unë kam pasur bindjen se ka elementë të tjerë që e kanë shtyrë.
Është ai që quhet kryetari de facto. Gabim në diskursin politik është i rëndë, sepse dy partitë e vjetra tentojnë të monopolizojnë politikën shqiptare ndërkohë që shumë të tjerë mendojnë ndryshe.
Deklarata e Bashës mbrëmë është gabim sepse tha dua të siguroj shqiptarët, ai mund të flasë vetëm në emër të demokratëve”, deklaroi Topi.
