Zgjedhorja, “tymi i bardhë” që pritet në orët e mbrëmjes nga rezidenca e Yuri Kim

Mbledhja e Këshillit Politik për Reformën Zgjedhore, e cila prej orës 11:00 po zhvillohet në rezidencën e Ambasadores së SHBA në Tiranë, Yuri Kim, është ndërprerë.

Mësohet se 4 anëtarët e Këshillit, Damian Gjiknuri (PS), Oerd Bylykbashi (PD), Rudina Hajdari (opozita e re) dhe Petrit Vasili (LSI) do të rimblidhen në orën 20:30 për të vijuar diskutimet.

Të pranishëm në mbledhje gjithashtu janë edhe Ambasadori Luigi Soreca dhe ai i Britanisë së Madhe, Duncan Norman.

Nuk dihet nëse palët kanë arritur të përparojnë drejt një konsensusi, sikundër u paralajmërua një ditë më parë nga Ambasadorët. Por burime diplomatike shprehen se konsensusi është shumë afër dhe zbatimi i Kodit Zgjedhor do të garantohet nga ambasadorët që po mbikqyrin diskutimet.

LEXO EDHE  Komediani i njohur apel demokratëve: Mos u vetëkënaqni me sondazhet që nxjerrin humbës piktorin, tregoni kujdes

Pika e vetme që duket se po mban pezull përmbylljen e draftit, bazuar te rekomandimet e OSBE/ODIHR është depolitizimi i Komisioneve Zgjedhore. Këtu palët duket se janë dakordësuar se nëse teknologjia e identifikimit të zgjedhësve do të ketë probleme, atëherë partitë politike do të kenë përfaqësuesit e tyre në komisionet zgjedhore.

Mësohet se palët janë dakordësuar për shkrirjen e KQZ dhe krijimin e një tjetër komisioni, me një formulë krejt të re, ku anëtarët do të kenë një mandat 9 vjeçar.

Ndërkohë që duket se palët kanë gjetur konsensus për identifikimin biometrik të zgjedhësve dhe trajtimin e ankesave.

Çështjet e tjera, pra kërkesa për qeveri tranzitore dhe ajo e ndryshimit të sistemit zgjedhor, nuk janë prekur nga palët.