Zgjedhorja, sot afati i fundit/ Çështja që mban pezull konsensusin në “tokën amerikane”

Këshilli Politik do të vijojë sot diskutimet në rezidencën e ambasadores së SHBA-së Yuri Kim, me një format të njëjtë si një ditë më parë, me ambasadorët Duncan Norman dhe Luigi Soreca, për arritjen e një konsensusi lidhur me reformën zgjedhore.

Çështja e cila duket se mban pezull konsensusin është ajo mbi administratën zgjedhore, ku PS përmes Damian Gjiknurit kërkon depolitizimin, ndërsa opozita e bashkuar ka propozuar një variant miks, pra një depolitizim të pjesshëm. Sipas variantit të propozuar nga opozita, në Komisionet Zgjedhore do të ketë një anëtar të depolitizuar, por në komisione forcat politike do të kenë përfaqësuesit e tyre.

Ndërkohë një ditë më parë, kur negociatat zgjatën rreth 9 orë, mësohet se palët janë dakordësuar lidhur me identifikimin biometrik të zgjedhësve, një kërkesë kjo e opozitës së bashkuar. Ndërsa socialistët ishin për aplikimin e teknologjisë në zonat pilot, opozita ka këmbëngulur për aplikimin e saj në të gjithë vendin dhe duket se kjo pikë është pranuar nga palët.

Po kështu në lidhje me trajtimin e ankesave zgjedhore, sërisht opozita dhe PS ndodhen pranë një zgjidhjeje, çka do të thotë se edhe kjo çështje mund të konsiderohet e arritur nëse palët sot nuk kanë ndryshuar qëndrimet.

Ndërkohë që çështje të tilla si sistemi zgjedhor, për të cilin në Këshillin Politik këmbëngul Rudina Hajdari, dhe qeveria tranzitore, një kusht i opozitës së bashkuar, nuk janë trajtuar në bisedimet nën komandën e ambasadorëve.

Kjo u bë e qartë edhe nga Ammbasadorja Yuri Kim dhe kolegët e saj të Britanisë së Madhe, Duncan Norman, dhe ai i BE-së, Luigi Soreca, që apeluan për arritjen e konsensusit vetëm për çështje që përfshihen në rekomandimet e ODIHR. Gjithsesi diplomatët thanë se nëse palët bien dakort edhe për çështje të tjera, pra përfshi edhe sistemin zgjedhor apo qeverinë tranzitore, atëherë ato nuk do të kundërshtojnë.

Por duket se për sistemin zgjedhor, përveç Rudina Hajdarit, asnjë prej partive nuk duket e interesuar, ndërsa qeveria tranzitore kundërshtohet prerazi nga socialistët e përfaqësuar nga Damian Gjiknuri në Këshillin Politik.
Presidenti Ilir Meta në distancë i ka drejtuar një apel pozitës dhe opozitës që të arrijnë konsensusin, duke i kujtuar datën 8 qershor.

LEXO EDHE  Basha apel qyetarëve nga Pogradeci: Merrni masa ndaj COVID, qeveria është dorëzuar

“Mesazhi i djeshëm i Bashkimit Europian është i qartë, zbatimi i kushteve fillon me konsensusin për reformën zgjedhore.

8 qershori po afron!

Komisioni Europian mezi po pret të shënojë një lajm pozitiv për Shqipërinë!”- shkruan Presidenti Meta në mesazhin e tij lidhur me Reformën Zgjedhore, pak orë para nisjes së bisedimeve të ditës së sotme.

Në anën tjetër, nënkryetari i PD-së, Edi Paloka, shkruan se BE e ka vënë kusht Reformën Zgjedhore konsensuale për hapjen e negociatave, jo si qëllim në vetvete, por për t’u garantuar shqiptarëve zgjedhje të lira e të ndershme.
“Qëllimi nuk është Reforma por Zgjedhjet e nëse Reforma nuk jep garanci për Zgjedhje atëherë për çfarë duhet??!!

Po le t’i shkojmë për një moment pas supozimit se reforma zgjedhore u dashka kryer sa për formë meqë është kusht dhe po presim nga dita në ditë “paketën” për hapjen e negociatave.

Opinioni është bombarduar me idenë se reforma duhet të realizojë vetëm disa pika të futura në korrnize si “rekomandimet e OSBE-ODIHR-it”. Po në fakt edhe rekomandimet e OSBE-ODIHR nuk janë sa për formë. Ato synojnë përmirësimin e Kodit Zgjedhor jo për estetike, po pikërisht për të garantuar zgjedhje të lira e të ndershme. Rekomandimi i parë i ODIHR është eliminimi i shit-blerjes dhe manipulimit të votës. E ky rekomandim ka ardhur pasi kjo qeveri në 7 vjet, në të gjitha zgjedhjet që ka organizuar; të pjesshme apo të përgjithshme, lokale apo parlamentare, ka vjedhur, ka blerë e ka manipuluar me të gjitha format, votën e shqiptarëve! E nëse kjo reformë nuk jep garancitë minimale që këto fenomene të mos përsëriten, kujt i shërben?”, shkruan Paloka.

Në orët në vazhdim do të shihet nëse palët do të arrijnë ose jo konsensusin, ndërsa “tymi i bardhë apo i zi” do të dalë nga rezidenca e ambasadores së SHBA, e cila është “tokë amerikane”. Kjo është hera e parë në 30 vitet e pluralizmit shqiptar që tentohet arritja e një marrëveshjeje në një rezidencë diplomatike.