Deputeti Lefter Maliqi u shpreh se Kryeministri Edi Rama bashkëpunoi me bandat dhe krimin vetëm për të marrë pushtetin, timonin dhe tepsinë.
Maliqi tha se Rama nuk e lëshon pushtetin, por opozita e bashkuar është fituese e zgjedhjeve kurdo që ata të bëhen për shkak të zhgënjimit të qytetarëve. Maliqi tha se Edi Rama ka 3 vjet që nxjerr tymin e zi në këtë vend.
“Ndërkombëtarët duhet të bëjnë vetë marrëveshjen dhe t´ia çojnë për firmë liderëve të partive në Shqipëri.Kjo është e vetmja rrugë që mund të kemi një marrëveshje, pasi Edi Rama nuk do marrëveshje.
Ka ardhur koha që Ambasadorja e SHBA, Yuri Kim, duhet të vendosë pikat mbi “I”, ambasadorja duhet t´u tregojë shqiptarëve kush e mori peng reformën”, tha Maliqi.
Sipas tij, Edi Rama nuk do reformë zgjedhore, ndërsa e quajti Damian Gjiknurin si një kukull.
“Rama nuk ikën, nuk do reformë zgjedhore, tymin e bardhë e nxjerrin vetëm shqiptarët me reagimin e tyre. Ky nuk ikën, ky përdor edhe policinë si të jetë politike. Nuk ka as rend dhe as siguri, kemi vrasje, kemi tritol në mes të Tiranës, kemi akte dhune ndaj adoleshentëve”, tha Maliqi.
Sipas tij, Presidenti po qëndron në mbrojtje të Kushtetutës dhe është e vetmja shpresë që mund të mbrojë reformën në drejtësi, e cila është kapur nga Edi Rama, që me zgjedhjen e Kryeprokurorit, që me caktimin e kunatit të deputetes së PS në krye të KLP, apo në institucionet e tjera të drejtësisë.
Maliqi tha se nëse nuk ka marrëveshtje, atëherë në shtator duhet të nisë revolucioni demokratik kundër këtij Kryeministri, i cili ikën vetëm me dhimbje.
Lidhur me shembjen e Teatrit, Maliqi tha se veprimet e forcave të RENEA janë vepër penale dhe nesër duhet të ketë një përgjegjës.
“Forcat RENEA lëvizin vetëm me urdhër të Drejtorit të Përgjithshëm të Policisë dhe e kanë të mirëpërcaktuar se për çfarë përdoren. Këto i përdorën kundër qytetarëve dhe artistëve”, tha Maliqi.
