Sot është afati i fundit për Reformën Zgjedhore, referuar “vijës së kuqe” të përcaktuar nga vetë politika shqiptare.
Këshilli Politik diskutoi pasditen e djeshme për 4 orë me radhë çështjet e mbetura pezull, ndërsa opozita nuk mori konsensusin e mazhorancës për të futur identifikimin biometrik të zgjedhësve në të gjitha qendrat e votimit.
Dakordësi nuk kanë gjetur as për administrimin zgjedhor.
Deri më tani PD-PS kanë rënë dakord për çështjen e rifinancimit të partive, kuotave gjinore, dhe periudhës se kur do të zhvillohen zgjedhjet.
Mbledha e rradhës e Këshillit Politik do të mbahet ditën e sotme në orën 17:00.
Ambasadorja amerikane në Tiranë Yuri Kim, por edhe diplomatë të tjerë të akredituar në Shqipëri, kanë kërkuar nga politikanët shqiptarë që të përmbushin angazhimet për përmbylljen e reformës brenda 31 majit.
Por duket se gjithçka është e vështirë nëse palët në Këshillin Politik nuk tërhiqen nga pozicionet e tyre. Nuk dihet se çfarë mund të ndodhë në orët në vazhdim, sikundër as qëndrimin që mund të mbajnë ambasadorët. Me shumë gjasa për çështjet e mbetura pezull mund të kërkohet edhe pak ditë kohë, ose produkti që do të dalë nga tryeza e Këshillit Politik do të jetë si një argument nga palët lidhur me procesin e zgjedhjeve të ardhshme.
Presidenti Ilir Meta është shprehur në deklaratën e fundit se do të uronte arritjen e një konsensusi, megjithëse u shpreh skeptik për të. Gjithsesi Kreu i Shtetit tha se do të dekretonte ligjin e ri zgjedhor dhe do të caktonte datën e zgjedhjeve të ardhshme, pa u konsultuar me palët politike.
