Shembja e Teatrit/ Dy inxhinierë dhe arkitektja thirren në Prokurori

Dy inxhinierë dhe një arkitekte. që firmosën dokumentin që i hapi rrugë shembjes së Teatrit Kombëtar janë thirrur në Prokurorinë e Tiranës, në kuadrin e hetimeve që kanë nisur mbi aktin e ndërmarrë rreth orës 04:30 të 17 majit.

Sikundër raportohet, ditën e hënë inxhinierët dhe arkitektja do të japin sqarime lidhur me vendimin që kanë firmosur.

Personat e kallëzuar janë inxhinierët Olsi Nunaj dhe Artur Hasantare si dhe arkitektja Elbarina Kola, që sipas kallëzuesit, Aleanca për Mbrojtjen e Teatrit, kanë kryer një ekspertim “fiktiv, i pabazuar në verifikime konkrete të gjendjes së Teatrit Kombëtar”.

Tre personat janë akuzuar për veprën penale “Shpërdorim Detyre” të parashikuar nga neni 248 i Kodit Penal, e kryer në bashkëpunim.

LEXO EDHE  BE merr në 'dorë' kontrollin e negociatave mes Serbisë dhe Kosovës, Hoti takohet me Macron

Në raportin e Institutit të Ndërtimit shkruhej se “kushtet aktuale të godinës së Teatrit Kombëtar nga ana statike nuk janë të përshtatshme për kryerjen e aktiviteteve, ato janë jashtë normave të projektimit dhe shfrytëzimit të një objekti të kësaj kategorie”.

Ndërkohë, kallëzuesit pretendojnë që këto vlerësime janë “të pabazuara në verifikimet në terren. Ekspertët kanë marrë atribute që nuk i takojnë me ligj duke çuar Këshillin Bashkiak në një vendimmarrje të gabuar”.

Sipas Aleancës, vendimi i shembjes së godinës së Teatrit Kombëtar rrezikon “një përplasje institucionale të fortë dhe qyteti rrezikon një konflikt civil me pasoja të paparashikueshme për rendin dhe sigurinë publike”.