Ish-ambasadori i Shqipërisë në Kosovë, Islam Lauka komentoi për Euronews Albania situatën politike që po kalon Kosova në lidhje me çështjen e bisedimeve Prishtinë-Beograd.
Lauka i tha gazetares Esmeralda Mulaj se deklarata e Presidentit Hashim Thaçi për të mos pranuar si ndërmjetës të BE-së Miroslav Lajçakun ishte e paprecedentë, e papërgjegjshme, foshnjarake dhe e papjekur.
“Mendoj se Kosova nuk e ka luksin për deklarata të tilla. Lajçak nuk është përfaqësues i Sllovakisë, e cila nuk e njeh pavarësinë e Kosovës, që ka votuar edhe kundër anëtarësimit të Kosovës në UNESCO, por Lajçak këtu vjen si përfaqësues i BE-së dhe ai mbështetet nga Gjermania dhe Franca, të cilat më shumë se një herë e kanë bërë të qartë mbështetjen ndaj tij,” – u shpreh Lauka duke këmbëngulur se deklarata e Thaçit nuk ishte prej një burri shteti.
Thaçi e justifikoi deklaratën e tij me pretendimin se Lajçak ka qenë kundër pavarësisë së Kosovës.
Ish-ambasadori shqiptar kujtoi se synimet kryesore të Kosovës janë integrimi euro-atlantik dhe vënia në diskutim e përfaqësuesve që kanë mbështetjen kryesore nga zyrat ndërkombëtare është papërgjegjshmëri.
I pyetur nëse prejardhjet e dy përfaqësuesve të lartë të BE-së, si Lajçak, por dhe Josep Borrell, mund të favorizojnë Serbinë në dialogun me Kosovën, Lauka këmbënguli se të dy janë përcjellës të politikave të BE-së.
“Ata përfaqësojnë Brukselin, tjetër gjë se Brukseli është disi i përçarë, ku 5 vende nuk e njohin Kosovën, përfshirë dhe Sllovakinë dhe Spanjën nga vijnë dy përfaqësuesit në fjalë, por ata në dialog vijnë si përfaqësues të organizatës së Bashkimit Evropian dhe ne na pëlqejnë apo nuk na pëlqejnë duhet të bisedojmë me ta duke treguar qëndrimet tona, por jo duke i refuzuar,” – u shpreh Lauka duke këmbëngulur se refuzimi është i pakuptimtë sepse përfaqësuesin nuk mund ta përcaktojë Kosova.
Ish-ambasadori u shpreh se qëndrimet publike duhen të jenë të matura dhe gjithmonë me në thelb interesat kombëtare.
Lauka ishte i mendimit se qëndrimi i Thaçit ishte më shumë personal, për faktin se Lajçak ka njohje më të afërt me Albin Kurtin.
Ai më tej krahasoi sjelljet me përfaqësuesin e Presidentit Donald Trump, Richard Grenell.
“Thaçi bën të fortin me Lajçakun dhe lepurin me Grenellin. Ai do të kompensojë disi servilizmin ndaj Grenellin,” – tha Lauka duke e përshkruar BE-në si “pa dhëmbë” krahasuar me SHBA-të.
