Trajneri i kombëtares së Kosovës, Bernard Challandes, ka folur me superlative për qendërmbrojtësin Amir Rrahmani.
Në një intervistë për “Radio Marte”, Challandes, ka deklaruar se nuk është i surprizuar nga transferimi i Amir Rrahmanit te Napoli duke shpjeguar në detaje se çfarë e bën 26-vjeçarin të veçantë.
“Nuk jam aspak i çuditur që Rrahmani është transferuar te Napoli, ai është një lojtar shumë i mirë dhe është rritur shumë duke luajtur ndeshje të mëdha ndërkombëtare, më parë me Dinamo Zagrebin e më pas me Veronën dhe Përfaqësuesen tonë”, tha ai fillimisht.
“Napoli ka bërë një blerje inteligjente për raportin cilësi-çmim, duke siguruar një lojtar të mirë me një vlerë të ulët. Cilësi më të mirë ka mbulimin, por është edhe i aftë të ndërtojë aksionin nga mbrapa. Është i aftë edhe në goditjet e dënimit në fazën ofensive, mund të shënojë 3-4 gola në sezon. Ka që tani nivelin për të qenë një titullar atje, është inteligjent dhe i përgatitur taktikisht, me Veronën luan me tre, por nuk do të ketë probleme të kalojë te mbrojtja me katër. Te Napoli mund të bëhet i rëndësishëm menjëherë”.
