Presidenti i Lyonit, Jean-Michel Aulas, ka kritikuar përsëri Ligën dhe Federatën Franceze për përfundimin e sezonit të futbollit përpara kohe, duke e quajtur hapin e hedhur si “vendim idiotësh”.
Ky qëndrim i ashpër, vjen pasi skuadra e tij e sheh veten jashtë Kupave të Europës për sezonin e ardhshëm, ndërsa kishin mundësitë për të arritur objektivat e tyre.
Në një prononcim për L’Equipe ai ka akuzuar autoritetet franceze për bllokimin e futbollit. “Pezullimi i Ligue 1 ishte një vendim prej idiotësh të vërtetë. Është paradoksale që një shtet si Spanja, që u prek më shumë se Franca nga Coronavirusi, reflektoi dhe gjeti një zgjidhje. UEFA kërkoi të kishim durim dhe na dha një protokoll sanitar, të cilin as nuk e shikuam fare.”
“Javier Tebas, (presidenti i La Ligës) mori pjesë në të njëjtat takime me Didier Quillot (Drejtori i Përgjithshëm i Lidhjes Franceze), ku u theksua nevoja për durim dhe pritje, ndërsa ne morëm atë vendim absurd.”
