Që nga e diela sotme, “gjendja e fatkeqësisë natyrore” dhe masat e jashtëzakonshme të Kryeministrit Edi Rama janë anti-kushtetuese, shprehet ish deputeti i PD, Oerd Bylykbashi.
Bylykbashi shpjegon se, mbajtja e këtyre masave përtej 23 majit nuk ka vlerë kushtetuese, sepse Parlamenti nuk mund ta zgjaste gjendjen e fatkeqësisë natyrore me shume se një muaj pa një vendim të ri.
Kufizimi i lëvizjes së lirë së shqiptareve dhe të gjitha lirive të tjera nga Kryeministri Rama, që nga dita e sotme 24 maj, e në vazhdim është antikushtetues, konstaton eksperti ligjor i Partisë Demokratike.
Ai shprehet se: “Qeveria duhej të kërkonte shtyrje të re 30 ditore me 23 maj, të raportonte në Parlament për masat e ndërmarra nga 24 prilli deri më 23 maj, të dëshmonte sa efikase ishin ato dhe pse duhej zgjatur edhe me 30 ditë të tjera gjendja e fatkeqësisë natyrore dhe kufizimi i lirive”. “Kjo është arsyeja e afatit kushtetues 30 ditor, llogaridhënia e qeverisë dhe jo tekat e Ramës në 22.00 të natës në Facebook. Parlamenti ka detyrimin që t’ju mbrojë të drejtat nga qeveria por harrojeni që ky Parlament si shtupë lecke në duart e Edi Ramës t’ju mbrojë”, shton.
Bylykbashi bën një apel për qytetarët.
“Statistikat e Covid 19 nuk justifikojnë rrëmbimin dhe dhunimin e të drejtave tuaja nga Edi Rama. Qytetarë, refuzoni që ‘distancimi social’ i neuroneve të Kryeministrit dhe pamundësia e tyre për t’u takuar me njëri-tjetrin në mendime logjike e racionale në interesin tuaj, të dhunojë LIRINË TUAJ TË LËVIZJES! Rimerrni të drejtat dhe liritë tuaja”, apelon ish deputeti.
