Kryeministri Edi Rama ka reaguar pas prezantimit të platformës nga Presidenti Ilir Meta, që sipas kreut të shtetit, ka qëllim përshpejtimin e integrimit në Bashkimin Europian.
Meta tha në një deklaratë për mediat, tha se ja ka dorëzuar platformën Ramës që më 8 Prill, ndërsa shtoi se nuk ka marrë përgjigje.
Ndërkohë, Rama në një reagim, shprehet se: “Presidenti nuk më ka dorëzuar asnjë platformë, por jam gati të ulem në çdo moment me të, me opozitën brenda/jashtëparlamentare e me partnerët e Reformës në Drejtësi, që t’i vëmë pikat mbi “i” të gjitha pikave të të gjitha palëve në shqip/anglisht, se teatri ra, iku e na la”.
“Jemi në prag të miratimit të Planit të Veprimit për Negociatat në Këshillin Kombëtar të Integrimit, s’ka rast më të mirë që Presidenti, Opozita, Institucionet e Drejtësisë, Partnerët Ndërkombëtarë për Drejtësinë dhe Integrimin, të mblidhen URGJENT në një tryezë me karta të hapura. Presidenti t’i lerë apelet natën për 20 burra e ditën për 11 pika! Opozita t’i lerë ultimatumet trupore e sharjet fëminore! Të dy bashkë ta lenë teatrin e mbledhjeve të komitetit të shpëtimit, se Shqipëria, parlamenti, qeveria, s’kanë kohë të luajnë ‘e ka kush e ka’ dezhurnin”, shton Rama.
