“Nuk do të ketë kulla në të gjithë perimetrin e Teatrit Kombëtar”, u shpreh Kryeministri Edi Rama në emisionin “Real Story”. Rama tha se nuk do të ketë asnjë kullë jo vetëm në territorin ku është Teatri Kombëtar, por edhe pas tij, madje në të gjithë territorin.
Kryeministri Rama tha se projekti fillestar ishte që toka publike, pra ajo e Teatrit, dhe toka private pas Teatrit të bashkohej, dhe të ndërtoheshin edhe Teatri dhe të zhvillohej prona private.
“Pse u tërhoqa unë? Sepse u bë grupi I punës me aktorët e vërtetë, jo ata të SHQUP-it, dhe aty përfaqësuesit e artistëve vunë kushte për gjërat që duhej të kishte teatri I ri. Kur erdhi oferta nga investitori u konsiderua e papranueshme.
Atëherë hymë në sistemin që Bashkia e Tiranës do të hynte në rolin e zhvilluesit”, tha Rama.
Deklarata e Ramës vjen në një kohë kur asnjë prej drejtuesve të Bashkisë së Tiranës nuk ka bërë një pohim të tillë, madje janë shprehur se pronat e bashkisë do të zhvillohen, duke mos përjashtuar edhe ndërtimin e kullave.
