Kreu i PD, Lulzim Basha, i ftuar në “Tempora” nga Sonila Meço, e cilësoi krim shembjen e Teatrit Kombëtar. Ai tha se do të ketë ndëshkim për ata të cilët shembën Teatrin Kombëtar, duke shtuar se shembjen e monumentit të kulturës e kanë dënuar edhe shumë zëra nga BE.
“Jemi në një pikë kthese, shumë artikujt të mediave të huaja e kanë cilësuar shembjen e Teatrit si një krim fashist që vjen era korrupsion. Nga reagimet e Donald Tusk dhe komisioneri Varhelyi, tek një njeri që ka punuar shumë për hapjen e negociatave. Shumë zëra nga Europa janë bashkuar për të dënuar krimin që ndodhi të dielën në mëngjes.
Duhet të ndëshkohen të pushtetshmit që abuzuan me pushtetin, të pushtetshmit që shkelën mbi liritë dhe të drejtat themelore. Ndëshkimi dhe dhënia fund kulturës së pandëshkueshmërisë. Ndërrohen pushtetet, por fajtorët kurrë nuk përballen me drejtësinë. Është zotimi im kryesor sonte nga kjo studio, do të jetë një nga pikat kryesore të programit qeverisës nesër.”-tha Basha.
Lideri demokrat tha se krimi i shembjes së Teatrit Kombëtar përbëhet nga pjesa materiale që është shkatërrimi i një ndërtesë historike, kulturore me rëndësi për Shqipërinë, por edhe fakti që një galvanizim i këtij inati nuk është parë kur u shembën shtëpitë te Unaza e Re apo në fund të Bulevardit të Ri.
“Nuk u panë kur u rrënuan standardet zgjedhore dhe mbyllja e televizioneve kritike ndaj qeverisë. As kur Shqipëria u kthye në një hambar droge. Kjo është pika e kthesës, vija e kuqe.”-deklaroi Basha.
Më tej, kreu i PD tha se ndëshkimi i së keqes dhe qeverisë, çon në largimin e tiranisë dhe se duhen ndëshkuar oligarkët dhe kryeministri Rama.
“Unë jam i vendosur që bashkë me opozitën dhe bashkë me qytetarët shqiptarë të vazhdojmë në këtë rrugë që është rruga e përmbysjes së tiranisë, por kjo nuk do të mjaftojë, duhet edhe ndëshkimi. Asnjë i përfshirë në këto krime nuk do ti shpëtojë ndëshkimit sipas ligjit.
E kam një obligim prej korrikut të 2018. E kam përsëritur disa herë gjatë këtyre 72 orëve, sot e përsëris që kjo e keqe mos kthehet duhet ndëshkuar. Nuk ndodh largimi i tiranisë pa ndëshkuar të keqen. Nuk është çështje hakmarrje. Është domosdoshmëri për të ecur përpara, për tu larguar nga rruga e tiranisë dhe arrogancës.”-tha Basha.
