Forca e jashtëzakonshme e karakterit të Cristiano Ronaldos është vlerësuar nga presidenti i PSG, Nasser Al-Khelaifi.
Pesë herë fituesi i “Topit të Artë” është shpallur kampion në tri liga të ndryshme, me Manchester United, Real Madridin dhe klubin aktual, Juventusin. Sulmuesi 35-vjeçar ka fituar, gjithashtu, pesë trofe të Ligës së Kampionëve, katër me të bardhët dhe një me “Djajtë e Kuq”, ndërsa e ndihmoi Juven të triumfonte në Seria A dhe Superkupën e Italisë sezonin e kaluar.
I përfolur për një kalim të mundshëm te PSG dy vjet më parë, Al-Khelaifi me deklaratën e fundit ka nxitur spekulime të reja.
“Vit pas viti, ai tregon një vendosmëri unike, një forcë të jashtëzakonshme karakteri. Ronaldo mbetet i motivuar nga dëshira për t’u përmirësuar çdo ditë dhe gjithmonë i shtyn kufijtë e tij. Unë e admiroj këtë vullnet të pamëshirshëm; është një shembull i shkëlqyeshëm për të gjithë sportistët e së ardhmes”. – tha presidenti i parizienëve për “France Football”.
