Dy shqiptarë, të arrestuar për kultivimin e kanabisit në sasi të mëdha, kanë dalë para Gjykatës mbretërore në Chelmsford.
Bëhet fjalë për shqiptarët Emiljan Gjura, 31 vjeç dhe Ermir Reshiti, 35 vjeç, pa adresë fikse, dhe që akuzohen për përfshirjen në kultivimin dhe në furnizimin me kanabis.
Ata u arrestuan në Rrugën Grainger më 20 prill, pasi policia zbuloi 3727 rrënjë kanabis, të kultivuara në një ndërtesë. Kanabisi i sekuestruar ka një vlerë mbi 2 milion paund.
Gjura dhe Reshiti kishin jetuar në ndërtesën industriale, ku kultivohej kanabisi.
Në Gjykatë u tha se Reshiti ishte trafikuar në Mbretërinë e Bashkuar rreth pesë muaj më parë dhe kishte punuar në fermën e drogës për një muaj para se të gjendej nga policia.
Gjura kishte shkuar në Mbretërinë e Bashkuar duke kërkuar punë për të ndihmuar gruan dhe vajzën e tij në Shqipëri, por ishte “shfrytëzuar” përmes statusit të tij të emigrantit.
Të dy burrat u shfaqën përmes videos dhe folën vetëm për të konfirmuar emrat e tyre.
Avokati mbrojtës tha se roli i tyre ishte i nivelit të ulët në operacionin e trajtimit të drogave, megjithatë, prokuroria tha se për shkak të sasisë së kanabisit të gjetur, roli është më domethënës.
Seanca e radhës do të zhvillohet më 22 qershor. Gjykatësi Andrew Hurst u tha të pandehurve se do të mbaheshin në paraburgim deri në paraqitjen tjetër të gjykatës.
Fermat e kanabisit ishte vendosur vetëm rreth 300 metra larg stacionit të afërt të policisë.
