Protesta kundër aktit të shembjes së Teatrit Kombëtar me vendim të Bashkisë së Tiranës, ka përfunduar pas rreth dy orë e 30 minuta, për tu rikthyer të mërkurën. Një nga organizatorët njoftoi në fund se ditën e nesërme nuk do të ketë protestë, për shkak se është Nata e Kadrit, ndërsa qytetarët dhe aktivistët do të rikthehen pranë sheshit ku ngrihej godina e teatrit, ditën e Mërkurë, në orën 17 e 30. Vendzhvillimi mbetet i njëjtë.
Protesta e sotme erdhi pas shembjes së Teatrit Kombëtar gjatë natës duke u gdhirë e diel, që pasoi me një ditë tensionesh, me aktivistë dhe qytetarë që teksa protestonin paqësisht u dhunuan nga policia.
Këtë të Hënë, tubimi i thirrur nga “Aleanca për Mbrojtjen e Teatrit” nuk pa skena të tilla ekstreme, megjithatë incidentet nuk munguan. U shënuan disa momente tensioni me konflikte fizike dhe persona të lënduar lehtë, të paktën dy, nga plasja e shashkave. Ndërkohë, artistët, duke folur nga podiumi i krijuar rishtazi, thanë se janë kundër dhunës, ndërsa theksuan se janë “provokatorët” ata që krijojnë tensione.
Mesazhet
Nga mikrofoni i protestës, artistë dhe aktivistë kërkuan largim të Edi Ramën nga drejtimi i qeverisë dhe i Erion Veliajt nga posti i kryebashkiakut të Tiranës.
Për ta, Rama dhe Veliaj janë përgjegjësit kryesorë për shembjen e Teatrit Kombëtar, akt që e cilësuar një krim. U kërkua hetim lidhur me shembjen e godinës së Teatrit. Po ashtu, u njoftua se protestat do të vijojnë.
Analisti Fatos Lubonja u shpreh se protestat qytetare në vijimësi janë e vetmja rrugë për të detyruar qeverinë, që e cilësoi një bandë kriminale, të dorëhiqet.
Regjisori Edmond Budina kërkoi mosbindje civile nga qytetarët. Një apel i bëri dhe Presidentit Ilir Meta: Të shpërndajë parlamentin.
Krerët e opozitës dhe pjesëtarë të saj ishin pjesë e protestës.
