Nga Boldnews.al
Ora 17.45, datë 14 maj, Policët e Bashkisë Tiranë (të Lali Erit), konstatuan një “kriminel me biçikletë”. Është 15 vjeç, por shumë i “rrezikshëm”. Ka thyer urdhrin e Edi Ramës, po po, të kryeministrit.
A të jetë e vërtetë kjo? Një çerek ore më shumë se orari i vendosur nga kryeqeveritari ynë ku i mitur shëtiste i qetë! Kriminel, mosmirënjohës për Edin dhe Lalin. Ka hipur në një biçikletë dhe shkeli ligjet e atij që e dha urdhrin nga kështjella e Surrelit.
Lajmërohen edhe policët e rendit. Katër efektivë të shqiponjave, si rrufe mbërrijnë aty. Rilindas të vërtetë, djem sypetritë, bijë të denjë të qeverisë. E shtrijnë në tokë 15 vjeçarin, shuplaka, grushte dhe shkelma mbi të. Janë katër njerëz me uniformë, por njëri dallon mbi të tjerët që në fillimin e shtrin përdhe mes ulërimash të miturin, i vendos shkelmin në fyt dhe nis ta godasë sa të mundet. Eh çfarë djali ky polic azgan… I rrëmben kriminelët minorenë që thyejnë jo karantinën, por urdhrin e atij të madhit, sa hap e mbyll sytë. Polic trim është ky. Pamja e vërtetë e Rilindjes sonë.
E gjitha kjo hyrje e parë, ngasa u përshkrua deri më tani, është për ata Rilindas që sot janë në qeveri, në polici, në administratë, të lyer e përlyer me pushtetin të cilët “fenë” mund ta ndryshojnë, por besimin tek partia që i mban, jo dhe jo.
Në të vërtetë, ai është një pis polic. Një arrogant i pushtetit, një personazh i lig, që kurresesi nuk i doli situata nga kontrolli, por iu errën sytë nga ky “kriminel” 15-vjeçar sepse kishte thyer rregullat që vendosi ai i madhi. Për turp ishin edhe katër efektivët e tjerë, që ndonëse nuk ushtrun dhunë të rëndë, e nduknin të miturin dhe as patën pikën e tentativës për të ndalur atë dorë të ndyrë të kolegët të tyre që herë bëhej shuplakë e herë grusht që binte mbi trupin e njomë dhe në rritje të një 15-vjeçari.
Me të drejtë dikush mund të mendojë se në një “pylll të madh” me polic, ka edhe derra të tillë. Po, është e vërtetë. Edhe pse në numër të vogël, uniformën e kanë veshur edhe policë të lidhur me krimin, efektivë që nuk u mbajnë nervat dhe janë të dhunshëm me më të pambrojturit dhe të miturit. Ka plot efektivë policie që zbatojnë ligjin me përpikmëri, që në situata konflikti tregohen njerëzore dhe profesionistë. Janë njerëz që përballen me krimin çdo ditë dhe nuk lëpihen para shefit të madh, që për dreq qëllon që gjithnjë të ketë një të njohur në kupolën e policisë, apo edhe të qeverisë.
U desh vetëm një shëtitje me biçikletë e një 15-vjeçari për të kuptuar këtë herë fytyrën e vërtetë të “kryepolic zhulit”. Turpi më i madh ndodhi pikërisht dje. Policia njoftoi se kishte pezulluar nga detyra efektivin që shfaqet në video duke dhunuar rëndë të miturin, i cili sot po trajtohet me psikolog, jo vetëm nga dhimbja trupore, por ajo psikologjike.
Në momentin kur u shfaq një polic “qejfli” që prekte të pasmet e së dashurës, këta kryepolicët zhul, urdhëruan menjëherë përjashtiminj e tij nga radhët e policisë, sepse donin të tregonin se për “prishje imazhi” të bëjnë gjëmën. Por tjetër kut matës patën me atë trimin e dhunshëm që dërmoi një të mitur. I dhanë vetëm pezullim deri në momentin që ajo “drejtoria e madhe” e Standarteve Etike dhe Profesionale të dilte me një “vendim të pjekur”.
Çfarë kërkohej më shumë sesa një krim policor me zë e figurë dhe me pamjet e dërmimit të një 15-vjeçari nga grushtet e shkelmat? Vetëm pezullim dhe jo shkarkim i menjëhershëm dhe kalim për ndjekje penale, qoftë edhe në gjendje të lirë. Ky është turpi që Rilindja e han me bukë çdo vaft të saj.
Në videon e shkurtër shfaqet ai polic i dhunshëm, por filmi i gjatë horror, triller dhe aksion, gatuhet çdo ditë nga kupola e Policisë së Shtetit. Ka ende drejtues që janë edhe më të pasur se “gjyqtarët dhe prokurorët”, që sot kanë ikur nga sistemi si të korrptuar. Ka policë me grada madhore që mbyllin sy, e madje bëhen palë në trafikun e drogës. Ka nga ata që mbrojnë kriminelët e rrezikshëm që të bredhin të lirë.
Për këtë kategori nuk ka problem, duhen lënë të livadhisin. Kryeministri i vendit del deri në tre orë në ditë në komunikime online, por qoftë edhe pak sekonda nga kështjella e tij në Surrel si nuk e gjeti që të paktën sa për sy gjoja ta dënonte atë akt?
Është fare e thjesht, mbi dhunën, terrorin, frikën, karantinimin po mbahet një pushtet dhe nëse dënohet publikisht një polic i dhunshëm, atëherë “sypetritët” e tjerë të Rilindjes do të stepen, e nëse shtang mjeti i dhunës, bie një pushtet që sot është ndërtuar mbi sulm, masa shtrënguese , kërcënime me shkatërrim dhe burg!
