Nga Boldnews.al
Në jetën e saj kishte firmosur në dy bordero; si thithëse fondesh kur militonte në organizatën “Mjaft”; dhe si kryedoganiere e vendit. Mjafton të përmendësh këto dy detaje për të kuptuar se është fjala për Ministren e Shtetit Elisa Spiropali. Pas një heshtje të gjatë në kohën e karantinës, gati të frikshme për Rilindasit të cilët u bënë merak nëse shoqe Elisa ishte mirë, tashmë ajo po shpërthen!
Sa herë ajo flet duke shkundur e tundur duart, si lideri shpitëror “Lala i madh” Ramë, apo Lali i vogël Veliaj, Spiropali trazon fort. Ajo fyen, anatemon, përbuz dhe injoron. “Të jeni të sigurt se Teatri i ri Kombëtar do ngrihet aty ku është ky sot, më i ri, më i bukur dhe më i fortë. Nuk kemi pasur teatër. Kanë qenë disa trushpëlarës dhe trushpëlarë, që e mbajnë veten për korifenj. Dhe nëse doni të vërtetën, 98 % e aktorëve do vazhdojnë të jetojnë aty në një skenë dinjitoze. Shqipëria ka nevojë për një teatër të vërtetë kombëtar dhe dinjitoz”-tha Spiropali në Parlament.
Foli një zonjë që kryeministrin Rama e quajti “Skënderbeu ynë”, duke fyer në gjenezë një komb që krahason Gjergj Kastriotin me një piktor shëtitës dhe një minidiktator që ka krijuar një shtet që jeton nën halucinacionet e kanabisit dhe batërdinë e koncesioneve.
Mendja e saj është kaq “brilante” sa edhe Don Kishotin e Servantës e quajti “personazh të letërsisë shqipe”, apo aktorin Timo Flloko, e ngatërroi me Çerçiz Topullin. Nuk është e vështirë që të analizon trurin e saj, pasi të paktën ajo e shfaq hapur përuljen deri në mohim të vetes dhe dinjitetit (nëse ka), duke krahasuar një kryeministër të ardhur me dyshimin e madh të votave të vjedhura nga para e drogës si “hero kombëtar”.
Çfarëdo ti thuhet, apo edhe të ketë këshilltarët më të mirë në botë, medja e saj nuk ndryshon, por për të ka vetëm një lutje: “mos fyej një artist, një qytetar, apo një popull”. Të konsiderosh qytetarët që protestojnë parë të mos rrëzuar një godinë historike si Tetari Kombëtar është më shumë se fyerje.
Fjalët e ministres sot diskutohen edhe emocianalisht. Dikush nga Rilindja i vlerëson, i mban si etalon me shprehjen: “Mirë ja bëri, e patë si i shau? I lumtë çupës sonë të partisë”. Të tjetër mund të shfrynë dufin në rrjetet sociale kundër saj dhe duket sikur gjithçka mbyllet barazim në një shoqëri të përçarë kaq shumë, pikërisht nga politikanë dhe politikane të këtij kalibri. Një krijesë genetikisht e modifikuar mes rrënjës së komunizmit dhe njeriut të ri Rilindas.
Po kur me kalimin e viteve këto deklarata të saj të analizohen ftohtë? Minimalisht ai brez i ri që nuk e ka jetuar kohën që po kalojmë do e ndjejë veten të fyer, duke iu drejtuar prindërve, vërtetë keni jetuar në ato kohëra kur një ministre ju fyen dhe ju nuk reagonit?!
Dhe faji është i yni, durimi jonë si shoqëri edhe kur fyhemi, përbuzemi, vidhemi, denigrohemi, nuk reagojmë por i japim krahë këtyre “truthareve” që e nisën karrierën me rroba të përdorura dhe laheshin me sapun duarsh, ndërsa sot të mbysin në aromën e parfumeve të ardhura nga Franca dhe bëjnë paradë mode me veshje firmato.
