Presidenti i Republikës, Ilir Meta depoziton padinë e dytë në Gjykatën Kushtetuese për çështjen e Teatrit Kombëtar. Kreu i shtetit ka shprehur qëndrimin e tij kundër shembjes së Teatrit Kombëtar, në një deklaratë këtë të Enjte, teksa njoftoi depozitimin e padisë.
Lëvizja e Metës vjen në kohën kur Bashkia e Tiranës e futi çështjen e shembjes së Teatrit në rendin e ditës për datën 15 muaj, kur do të mblidhet edhe Këshilli Bashkiak.
Presidenti paralajmëroi ditën e shtunë, pas miratimit nga qeveria të vendimit që i jep pronësinë e tokës së Teatrit, Bashkisë Tiranë, se nëse nuk ka reflektim, atëherë do të depozitojë një padi të dytë në Kushtetuese, gjykatë që ende është jashtë funksionit.
“Çdo veprim apo vendim për të cenuar godinat e Teatrit Kombëtar është jashtë çdo llogjike të funksionimit të shtetit të së drejtës dhe sundimit të ligjit në Shqipëri dhe do të dhunonte në mënyrë kriminale rendin kushtetues, në kundërshtim të plotë edhe me interesin publik dhe kombëtar”, u shpreh Meta.
Pas deklaratës së Metës, kryetari i Bashkisë së Tiranës iu drejtua Presidentit me fjalët: Mos u bëj brigadier komunaleje!
DENONCO